Հս. Կորեան մինչև կորոնավիրուսի բուժման մեթոդների մշակումն ու հայտնաբերումն օտարերկրացիների համար երկրի սահմանները չի բացի

Կորեայի Ժողովրդադեմոկրատական Հանրապետությունը մինչև կորոնավիրուսի բուժման մեթոդների մշակումն ու հայտնաբերումն օտարերկրացիների համար երկրի սահմանները չի բացի, հայտնում է «ՌԻԱ Նովոստի» գործակալությունը` հղում տալով ԿԺԴՀ առողջապահության փոխնախարար Կիմ Հյոն Հունի հայտարարությանը:

«Սահմանային անցակետերով, ծովային նավահանգիստներով և օդանավակայաններով բոլոր օտարերկրացիների մուտքը երկիր արգելվում է: Ծրագրվում է մինչև կորոնավիրուսի բուժման մեթոդների վերջնական մշակումն առաջնորդվել այդ նույն սկզբունքով»,- հայտարարել է Կիմ Հյոն Հունը:

Փոխնախարարը ևս մեկ անգամ հաստատել է, որ ԿԺԴՀ-ում COVID-2019 կորոնավիրուսով վարակման որևէ դեպք չի գրանցվել, ինչպես նաև վարակվածներ չեն եղել արտասահմանից ժամանածների և նրանց հետ կապ ունեցած անձանց շրջանում, որոնք, սակայն, այժմ կարանտինի մեջ են գտնվում:

Ինչպես ավելի վաղ հայտնել էր Կիմ Հյոն Հունը, կառավարությունը խթանում է հյուսիսկորեացի դեղագործների օգնությամբ երկրում առկա դեղամիջոցներով, օրինակ կռատուկի արմատով, վիրուսի դեմ դեղորայքի ստեղծումը:

Ավելի վաղ, ԿԺԴՀ-ն հայտարարել էր «ազգային արտակարգ կարանտինային համակարգի» գործարկման մասին և բոլոր հնարավոր միջոցառումներն էր իրականացրել երկրի տարածքում կորոնավիրուսի տարածումը կանխարգելելու նպատակով: ԿԺԴՀ-ի իշխանություններն օտարերկրացիների համար փակել են երկրի սահմանը և որոշում են կայացրել մեկ ամսվա ընթացքում բժշկական հետազոտության համար մեկուսացնել բոլոր նրանց, ովքեր հունվարի 13-ից հետո գտնվել են Չինաստանում:

Վերջին տվյալներով` Չինաստանում կորոնավիրուսով վարակման հաստատված դեպքերի թիվը գերազանցել է 78 հազարը, ավելի քան 29 հազարը բուժվել և դուրս է գրվել հիվանդանոցներից, իսկ մահացածների ընդհանուր թիվը հասել է 2715-ի:

Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին: Համաճարակը բռնկվել է 11 մլն բնակչություն ունեցող Ուհան քաղաքում:

Ամբողջ աշխարհում մարդիկ խուճապի են մատնվել սրընթաց տարածվող մահացու կորոնավիրուսի պատճառով: Հիվանդների ու զոհերի թիվն օրեցօր ավելանում է, իսկ վարակման դեպքեր են արձանագրվել նաև Չինաստանից դուրս մի շարք երկրներում, ինչը հանգեցրել է համաշխարհային խուճապի: