«Եթե ինչ-որ մեկն այս պատմության մեջ պետք է իրեն վիրավորված զգա, ապա դա մենք ենք». Մեգան Մարքլ

Սասեքսի դքսուհի Մեգան Մարքլը հավատացած է, որ ինքն ու ամուսինը՝ Մեծ Բրիտանիայի արքայազն Հարին, «քննադատությունների կիզակետում են հայտնվել» իրենց՝ թագավորական ընտանիքից անկախանալու որոշման համար, և նրանց հանդեպ կիրառվող «սահմանափակումներն» այդ ամենի «փոխհատուցումն են»: Այս մասին, Daily Mail-ի հաղորդմամբ, հայտնել է դքսուհու մտերիմ ընկերներից մեկը:

Անցյալ շաբաթ լրատվամիջոցները հաղորդեցին, որ Մեծ Բրիտանիայի թագուհի Էլիզաբեթ 2-րդը և մի շարք այլ բարձրաստիճան պալատական պաշտոնյաներ կարծում են, որ թագավորական զույգն ավագ անդամների լիազորությունները վայր դնելուց հետո չի կարող օգտագործել Sussex Royal կոչումը:

Ի պատասխան՝ թագավորական զույգը թագուհուն և ընտանիքի մյուս ավագ անդամներին ուղղված առցանց հայտարարություն էր տարածել՝ նշելով, որ Սասեքսի դուքսի և դքսուհու տիտղոսից կհրաժարվեն մարտի 31-ից սկսած, երբ նրանց լիազորությունները պաշտոնապես կդադարեցվեն: Բացի այդ, զույգը հայտարարել է, որ թագուհին երկրի սահմաններից դուրս որևէ իրավասություն չունի թագավորական (Royal) բրենդի նկատմամբ, ուստի՝ իրենք կարող են արտասահմանում այն հանգիստ կիրառել:

«Մեգանն ասաց, որ նրանք երկընտրանք չունեին»,- հրապարակման վերաբերյալ հարցին պատասխանել է դքսուհու ընկերը:

«Նա ասաց, որ եթե ինչ-որ մեկն այս պատմության մեջ պետք է իրեն վիրավորված զգա, ապա դա նրանք պետք է լինեն: Նրանք նպատակ չեն հետապնդել հարստանալ «թագավորական» բառն օգտագործելով, և ակնարկել, որ նրանք ինչ-որ կերպ չարաշահում են իրենց արտոնությունները, անհեթեթություն է»,- ասել է նա:

Նրա խոսքով՝ Մեգանը և Հարին կշարունակեն անտեսել իրենց շրջապատող նախանձն ու չարությունը՝ կենտրոնանալով «բարության վրա»:

«Նա ասաց, որ շարունակելու է պաշտպանել Հարիին, քանի որ նա իրեն հանդիպած ամենահավատարիմ ու ամենանվիրված մարդն է»,- ասել է աղբյուրը:

Ավելի վաղ Բուքինգհեմյան պալատը հայտնել էր, որ արքայազն Հարիի և միապետական ընտանիքի մյուս անդամների միջև համաձայնություն է կնքվել ամուսինների հետագա կարգավիճակի մասին:

Արքայազնի և նրա կնոջ պաշտոնական կարգավիճակի փոփոխություններն ուժի մեջ կմտնեն այս տարվա գարնանից: