Հնդկաստանում Թրամփի ժամանումից հետո բողոքի զանգվածային ցույցեր և անկարգություններ են սկսվել. կա 7 զոհ (լուսանկարներ)

ԱՄՆ նախագահ Դոնալդ Թրամփի` Հնդկաստան կատարած այցից հետո մայրաքաղաք Դելիում բողոքի մեծամասշտաբ ցույցեր են սկսվել, հայտնում է The Guardian պարբերականը:

Դելիի փողոցներում բախումները հիմնականում տեղի են ունեցել քաղաքացիության մասին նոր օրենքի կողմնակից և դրան դեմ հարյուրավոր ցուցարարների, զինված ամբոխի և ոստիկանների միջև: Բախումների հետևանքով երկուշաբթի օրը մահացել է յոթ մարդ`մեկ ոստիկան և վեց քաղաքացի: Ոստիկանությունը ցուցարարներին ցրելու նպատակով արցունքաբեր գազեր և ծխային նռնակներ է կիրառել:

Դելիում բախումներ են եղել նաև հինդու ազգայնականների և կոմունիստական խմբերի միջև, որոնց մի մասը դեմ է եղել Թրամփի`առաջին անգամ պաշտոնական այցով Հնդկաստան ժամանելուն, մյուսներն էլ աջակցել են վերջինիս:

Դելիի քաղաքապետը հայտնել է, որ պետք է բոլոր ջանքերը գործադրվեն կրկին խաղաղություն հաստատելու համար, ինչպես նաև հորդորել է քաղաքացիներին զերծ մնալ բռնությունից:

Ինչպես ավելի վաղ նշել էր Tert.am-ը, Միացյալ Նահանգների նախագահ Դոնալդ Թրամփը կնոջ՝ Մելանյայի հետ երկօրյա այցով նախօրդ օրը ժամանել է Հնդկաստան, որտեղ նրան դիմավորել է վարչապետ Նարենդրա Մոդին: Այնուհետև ԱՄՆ նախագահական զույգին տարել են կրիկետի՝ աշխարհում ամենամեծ, 100 մլն դոլար արժողությամբ մարզադաշտ:

«Ամերիկան սիրում է Հնդկաստանը, Ամերիկան հարգում է Հնդկաստանին, և Ամերիկան միշտ էլ հավատարիմ ընկեր կմնա հնդիկ ժողովրդի համար»,-հայտարարել է Թրամփը, որը նախագահի պաշտոնում առաջին անգամ է այս երկիր այցելել:

ԱՄՆ ղեկավարը հույս է հայտնել, որ իրեն և վարչապետ Մոդիին կհաջողվի լուծել երկրների միջև առկա բոլոր տարաձայնությունները: