Չինաստանում նոր կորոնավիրուսի դեմ պատվաստանյութ են ստեղծել

Ռուսաստանում Չինաստանի դեսպան Չժան Հանհուեյն այսօր` փետրվարի 24-ին հայտարարել է, որ Չինաստանում պատվաստանյութ են ստեղծել, որն արդյունավետություն է ցույց տվել նոր կորոնավիրուսի դեմ պայքարում: Այս մասին տեղեկացնում է life.ru կայքը:

«Չինաստանում արդեն պատվաստանյութ են ստեղծել, որը դիմադրում է կորոնավիրուսին: Բայց դա դեռևս նախնական է, հարկավոր են հետագա ստուգումներ և աշխատանքներ»,-ասել է դեսպանը Մոսկվայում լրագրողների հետ կայացած հանդիպման ընթացքում:

Դեսպանը տեղեկացրել է նաև մի շարք այլ դեղամիջոցների ստեղծման մասին, որոնք արդյունավետ կերպով պայքարում են կորոնավիրուսի դեմ:

«Չինական որոշ դեղամիջոցների արդյունավետությունը 85%-ից ավելի է, որոշ շրջաններում` 90%-ից ավելի»,-հավելել է դեսպանը:

Չժան Հանհուեյը հերթական անգամ հերքել է կորոնավիրուսի` արհեստական առաջացման մասին վարկածը և ենթադրել է, որ վիրուսը կարող է առաջացած լինել վայրի կենդանիներից: Վարկածն այն մասին, որ հիվանդության «տերերը» չղջիկներն են, ստուգվում է, բայց դեռևս հաստատված չէ:

Մահացու կորոնավիրուսի դեմ պայքարող պատվաստանյութ պատրաստելու համար աշխատում են նաև ԱՄՆ-ի 5 դեղագործական ընկերություններ: Իսկ Լոնդոնի կայսերական քոլեջի հետազոտողները հայտարարել են կորոնավիրուսի դեմ նոր պատվաստանյութի պատրաստման ավարտի մասին: Բայց հարցը ոչ միայն պատվաստանյութի պատրաստումն է, այլ նաև դրա փորձարկումը, որը շատ ավելի երկար ժամանակ կխլի:

Ինչպես ավելի վաղ տեղեկացրել էր Tert.am-ը, Չինաստանում կորոնավիրուսով վարակման հաստատված դեպքերի թիվը գերազանցել է 77 150-ը, որոնցից 2592-ը՝ մահվան ելքով, 24 734-ը բուժվել և դուրս են գրվել հիվանդանոցներից:

Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին: Համաճարակը բռնկվել է 11 մլն բնակչություն ունեցող Ուհան քաղաքում:

Վերջին օրերին ամբողջ աշխարհում մարդիկ խուճապի են մատնվել սրընթաց տարածվող մահացու կորոնավիրուսի պատճառով: Հիվանդների ու զոհերի թիվն օրեցօր ավելանում է, իսկ վարակման դեպքեր են արձանագրվել նաև Չինաստանից դուրս մի շարք երկրներում, ինչը հանգեցրել է համաշխարհային խուճապի: