Գրետա Տունբերգի մայրը պատմել է դստեր խնդրահարույց մանկության մասին

 Գրետա Տունբերգի մայրը՝ օպերային երգչուհի Մալենա Էրնմանը, նոր գրքում պատմել է դստեր մանկության մասին՝ նկարագրելով այն դժվարությունները, որոնց ստիպված է եղել բախվել շվեդ էկո-ակտիվիստուհին, հաղորդում է Guardian պարբերականը, որը հատվածներ է մեջբերել «Մեր տունը այրվում է.ընտանիքի և մոլորակի տեսարաններ ճգնաժամի մեջ» ( Our House is on Fire: Scenes of a Family and a Planet in Crisis) գրքից:

«Նա դադարեց դաշնամուր նվագել։ Դադարեց ծիծաղել, դադարեց խոսել և դադարեց ուտել»,- գրում է 17-ակտիվիստուհու մայրը։

11 տարեկանում Գրետան «գրեթե համր» էր, և օրվա մեջ համաձայնում էր ուտել միայն մի փոքրիկ բուռ բրինձ և ավոկադո։

Ի վերջո աղջկան հոսպիտալացրել են, երբ երկու ամսվա ընթացքում կորցրել է գրեթե 10 կիլոգրամ։ Ավելի ուշ, բժիշկները Գրետայի մոտ ախտորոշել են աուտիզմ։

Մոր խոսքով՝ Էկոլոգիական խնդիրների նկատմամբ հետաքրքրությունը Գրետայի մոտ առաջացել է Խաղաղ օվկիանոսում պլաստիկայի մասին դպրոցում դասերից մեկի ժամանակ ցուցադրված ֆիլմից հետո։ Սակայն մյուս երեխաների մոտ ֆիլմն արձագանք չի առաջացրել։

«Նա տեսավ այն, ինչ մյուսները չէին ուզում տեսնել։ Թվում էր, թե նա անզեն աչքով տեսնում է ածխաթթու գազի արտանետումները»,- հայտնել է Էրնմանը։

Հիշեցնենք, որ 17-ամյա Գրետա Տունբերգը համաշխարհային էկոլոգիական շարժման առաջնորդն էր դարձել ՄԱԿ-ի կլիմայի հարցերին նվիրված գագաթնաժողովում իր ելույթից հետո, որի ժամանակ մեղադրել էր երկրների ղեկավարներին և պաշտոնյաներին՝ կլիմայական ճգնաժամը կանխելու համար անհրաժեշտ քայլեր չձեռնարկելու և գիտական փաստերն արհամարհելու համար, որոնք հաստատում են վերահաս էկոլոգիական աղետը: