Իրանը դադարեցնում է ուխտագնացությունները դեպի Իրաք կորոնավիրուսի տարածման վտանգի պատճառով

 Իրանի իշխանությունները որոշում են կայացրել ժամանակավորապես դադարեցնել ուղևորություններն Իրաք՝ նոր տեսակի կորոնավիրուսի տարածման վտանգի պատճառով: ТАСС գործակալության փոխանցմամբ՝ այս մասին շաբաթ հայտնել է Իրանի Հաջի և ուխտագնացության կազմակերպության ներկայացուցիչը:

Նրա խոսքով՝ ուխտագնացություններն Իրաք օդային տրանսպորտով դադարեցվել են: Վերջինս հավելել է, որ դադարեցվել է նաև ցամաքային հաղորդակցությունը:

Իրանում հիվանդության առաջին դեպքերն արձանագրվել են փետրվարի 19-ին: Ներկա պահին արձանագրվել է հիվանդացության 28 դեպք, որոնցից 5-ը՝ մահվան ելքով:

Հիշեցնենք, որ կորոնավիրուսի տարածման մասին Չինաստանի իշխանություններն Առողջապահության համաշխարհային կազմակերպությանը տեղյակ են պահել դեկտեմբերի 31-ին: Վերջին տվյալներով՝ Չինաստանում նոր տեսակի կորոնավիրուսի հետևանքով մահացածների թիվը հասել է 2345-ի, վարակված է ավելի քան 76 000 մարդ, ապաքինվել է 20,659 մարդ: