Իդլիբում ռազմական գործողություն սկսելու դեպքում ՆԱՏՕ-ն չի օգնի Թուրքիային

ՆԱՏՕ-ն մտադիր չէ ռազմական աջակցություն ցուցաբերել Անկարային, եթե Թուրքիան ռազմական գործողություն սկսի Իդլիբում: Այս մասին ТАСС գործակալությանը տեղեկացրել է Բրյուսելում հյուսիսատլանտյան դաշինքի երկրներից մեկի դիվանագիտական աղբյուրը:

«ՆԱՏՕ-ի անդամ երկրները չեն աջակցի Հինգերորդ հոդվածի ակտիվացմանը փետրվարի սկզբին Իդլիբում թուրք զինծառայողների մահվան պատճառով: ՆԱՏՕ-ն չի քննարկում Թուրքիային ռազմական աջակցություն տրամադրելու հարցն՝ այդ տարածքում ռամական գործողություն անցկացնելու դեպքում»,-նշել է աղբյուրը:

ՆԱՏՕ-ի կանոնադրության 5-րդ հոդվածում ասվում է, որ դաշինքի անդամ մեկ կամ մի քանի երկրների վրա հարձակումը կարող է դիտվել որպես հարձակում ամբողջ կառույցի վրա, և կառույցը կարող է հավաքական պաշտպանության իրավունք ստանալ:

Հիշեցնենք, որ 2019 թվականի հոկտեմբերի 22-ին Սոչիում Ռուսաստանի և Թուրքիայի նախագահներ Վլադիմիր Պուտինի և Ռեջեփ Թայիփ Էրդողանի հանդիպման արդյունքում կնքվել է հուշագիր, որի 5-րդ կետում նշվում է, որ հոկտեմբերի 23-ի ժամը 12:00-ից սկսած՝ թուրք-սիրիական սահմանի սիրիական կողմում, որը դուրս է Թուրքիայի «Խաղաղության ակունք» գործողության շրջանից, կմտնեն ՌԴ ռազմական ոստիկանության և Սիրիայի սահմանապահ ջոկատները: Նրանք պետք է նպաստեին քրդական խմբավորումների դուրսբերմանը թուրք-սիրիական սահմանից 30 կմ հեռավորության վրա, որը պետք է ավարտվեր հոկտեմբերի 23-ի ժամը 12:00-ից սկսած՝ 150 ժամվա ընթացքում:
Փետրվարի 4-ին Թուրքիան հայտարարել է, որ Ռուսաստանի աջակցությունը վայելող Սիրիայի կառավարական ուժերի գործողությունների հետևանքով 7 թուրք զինվոր է մահացել, ինչի պատճառով ռուս-թուրքական հարաբերություններում առաջացած լարվածությունը թույլ չի տալիս շարունակել համատեղ պարեկությունը: