Հեղեղված քաղաքներ եւ տապալված ծառեր. Եվրոպայում մոլեգնող փոթորիկը՝ լուսանկարներով

«Կիարա» փոթորիկը գիշերը հարվածել է Կորսիկային, որտեղ իշխանությունները հայտարարել են վտանգի նարնջագույն մակարդակի մասին: Քամու արագությունը հասնում է ժամում 220 կմ-ի: Հատկապես բարդ իրավիճակ է Պիետրակորբա շրջանում, որտեղ արդեն ոչնչացվել է անտառի 70 հեկտար տարածք, հաղորդում է Euronews-ը:

Նորմանդիայում 15 հազար տուն մինչ այժմ մնում է առանց էլեկտրականության: Ֆրանսիայում առնվազն 2 մարդ է զոհվել, 30 մարդ վնասվածք է ստացել:

Նախօրեին երկրի հյուսիսում քամին այնքան ուժգին է եղել, որ մայրուղու վրա բեռնատար է շրջվել:

Գերմանիայում, որտեղ արդեն հայտնել են 7 զոհի մասին, փոթորիկն անվանում են «Սաբինա»: Գերմանիայի մի շարք քաղաքներում խախտվել է երկաթուղային եւ օդային հաղորդակցությունը:

Շվեյցարիայի հյուսիսային եւ կենտրոնական շրջաններում մետեոծառայությունները զգուշացնում են ձնաբքի մասին:

«Սաբինան» հասել է նաեւ Լեհաստան, որտեղ հայտնել են տանիքի փլուզման հետեւանքով 3 զոհի, ինչպես նաեւ էլեկտրաէներգիայի հետ կապված խափանումների մասին: Նման իրավիճակ է նաեւ Չեխիայում, որտեղ առանց էլեկտրականության է մնացել մոտ 230 հազար ընտանիք:

Միեւնույն ժամանակ, Բրիտանիայում եւ Իռլանդիայում բնակիչները փորձում են վերացնել տարերային աղետի հետեւանքները:

Ձմեռը դեռ չի ավարտվել, եւ մոտակա ժամանակներս ձնաբուք է սպասվում նաեւ Բրիտանիայում եւ Իռլանդիայում: