Լուսանկարիչը ֆիքսել է, թե ինչպես է կայծակը երեք անգամ անընդմեջ հարվածում աշխարհի ամենաբարձր շենքին (լուսանկար)

Դուբայում լուսանկարիչը ֆիքսել է, թե ինչպես է կայծակը երեք անգամ անընդմեջ հարվածել աշխարհի ամենաբարձր կառույցի՝ «Բուրջ Խալիֆա» աշտարակի գագաթին, որի բարձրությունը 828 մետր է:

Ինչպես ներկայացնում է Fox News-ը, 33-ամյա Զոհաիբ Անջումն արտասովոր երևույթը պատկերել է ուժեղ քամիների ժամանակ: «Դա բառացիորեն տեղի է ունենում մեկ ակնթարթում, կարող ես աչքդ թարթել և բաց թողնել պահը: Դա հնարավոր չէ տեսնել անզեն աչքով, դա կարելի է տեսնել դանդաղեցված կադրով»,- ասել է լուսանկարիչը:

Հազվադեպ երևույթը հայտնի է «Կայծակների շարան»: Այն տեղի է ունենում, երբ քամին փչում է կայծակի ալիքի ուղղությամբ դրա առաջացման պահին:

«Որքան ուժեղ լինի քամին և որքան մոտ կայծակին, այնքան շատ հորիզոնական կայծակնային գծեր կերևան պատկերում»,- նշվում է Storm Highway մասնագիտացված պորտալում:

Լուսանկարչի խոսքով՝ նա 7 տարի շարունակ փորձել է նման կադր ստանալ, սակայն առաջին անգամ է հաջողվել: