Սնոուդենը որոշել է երկարացնել Ռուսաստանում բնակության թույլտվությունը

ԿՀՎ-ի եւ ԱԱԳ նախկին աշխատակից Էդվարդ Սնոուդենը որոշել է երկարացնել Ռուսաստանում բնակության թույլտվությունը, որի ժամկետը սպառվում է ապրիլին, պատմել է նրա փաստաբան Անատոլի Կուչերենը, հաղորդում է «Ինտերֆաքս»-ը:

«Էդվարդի խնդրանքով՝ ես պատրաստում եմ փաստաթղթերը ՌԴ ՆԳՆ միգրացիոն ծառայություն ներկայացնելու համար բնակության թույլտվությունը երկարացնելու համար»,-պարզաբանել է նա:

Կուչերենի խոսքով՝ նրանք քննարկել են դա փետրվարի 6-ին: Սնոուդենի մոտ «ամեն ինչ կարգին է», նա «աշխատում է», նրա հետ է իր տիկինը: Պատրաստվո՞ւմ է արդյոք Սնոուդենը խնդրել տրամադրել իրեն Ռուսաստանի քաղաքացիություն, Կուչերենը տեղյակ չէ. նրանք դեռեւս դա չեն քննարկել:

Այն մասին, որ Սնոուդենը գաղտնի ամուսնացել է, դեռեւս ապրում է Ռուսաստանում, հայտնի է դարձել 2019 թվականի փետրվարին՝ նախքան իր հուշագրությունների լույս տեսնելը:

Ամերիկացին նաեւ ասել է հարցազրույցներից մեկում, որ ապաստան է հայցել Ֆրանսիայից: Ֆրանսիայի ՆԳՆ-ում հաստատել են, որ ստացել են նրա խնդրանքը 2013 թվականին:

Սնոուդենը լքել է ԱՄՆ-ը 2013 թվականին՝ ներբեռնելով հատուկ ծառայությունների՝ ուրիշ պետությունների ղեկավարների, օտարերկրացիների եւ ԱՄՆ քաղաքացիների էլեկտրոնային հետապնդման մասին փաստաթղթերը: Նա փոխանցել է այդ փաստաթղթերը լրագրողներին հրապարակելու համար:

Սկզբում նա թաքնվում էր Հոնկոնգում, այնուհետեւ ժամանել էր Մոսկվա, որտեղից պատրաստվում էր մեկնել երրորդ երկիր, սակայն մնացել էր «Շերեմետեւո» օդանավակայանի տրանզիտային գոտում, քանի որ Վաշինգտոնը չեղարկել էր նրա անձնագիրը: Նա ստացել էր ժամանակավոր ապաստան Ռուսաստանում, իսկ 2014 թվականի օգոստոսին՝ բնակության թույլտվություն երեք տարի ժամկետով եւ երկարացրել այն եւս երկու տարով 2017 թվականի հունվարին:

ԱՄՆ-ում Սնոուդենը մեղադրվում է լրտեսության եւ պետական սեփականությունը հափշտակելու մեջ: