Թուրքիան հատուկ նշանակության ջոկատ է ուղարկում սիրիական Իդլիբ

 Թուրքիան հատուկ նշանակության ջոկատ է ուղարկում սիրիական Իդլիբի նահանգի դեէսկալացիոն գոտում գտնվող դիտակետեր, գրում է թուրքական «Անադոլու» գործակալությունը:

Հատուկջոկատայիններով, հատուկ տեխնիկայով և ռազմամթերքով 150 բեռնատարների ավտոշարասյունը հասել է Սիրիային սահմանամերձ թուրքական Ռեյհանլը քաղաք, որտեղից էլ կշարժվի Սիրիա:

Ինչպես ավելի վաղ տեղեկացրել էր Tert.am-ը, փետրվարի 3-ին Սիրիայի կառավարական ուժերի կողմից Իդլիբ նահանգում իրականացված հրետակոծության հետևանքով թուրքական զինուժը զոհեր և վիրավորներ է ունեցել: Թուրքական բանակի 4 զինծառայող է մահացել, 9 զինծառայող վիրավորվել է:

Թուրքիայի նախագահ Ռեջեփ Թայիփ Էրդողանն օրերս կոչ է արել ՌԴ նախագահ Վլադիմիր Պուտինին ազդել Սիրիայի առաջնորդ Բաշար ալ Ասադի վրա` Իդլիբի նահանգում իրավիճակի սրման հետ կապված: Փետրվարի 4-ին Պուտինն ու Էրդողանը հեռախոսազրույց էին ունեցել: Կրեմլում տեղեկացրել են, որ երկու նախագահներն էլ ընդգծել են Սիրիայում ռուս-թուրքական պայմանավորվածությունների կատարման կարևորությունը:

Անկարայում էլ նշել են, որ չեն բացառում, որ Ասադի բանակի գործողություններին ռազմական պատասխան կտան:

«Իդլիբից մեր սահմաններին մոտեցող փախստականների թիվը գրեթե մեկ միլիոն է: Երեկ ես Պուտինի հետ խոսում էի այն մասին, որ Ասադը հետ քաշի իր զորքերը Սոչիի համաձայնագրով նախատեսված անվտանգության գոտուց, այլապես Թուրքիան ստիպված կլինի գործել պաշտպանությունից ելնելով, այնպես, ինչպես հարկ է համարում»,-ասել էր Էրդողանը փետրվարի 5-ին կայացած «Արդարություն և զարգացում» կուսակցության խորհրդարանական խմբակցության հետ հանդիպման ժամանակ:

Թուրքիայի նախագահն ընդգծել է, որ եթե փետրվարի ընթացքում Սիրիայի կառավարական ուժերը չնահանջեն Իդլիբում գտնվող երկու թուրքական դիտակետերից, Թուրքիան ստիպված կլինի նոր գործողություն սկսել: