Դևիդ Քեմերոնի թիկնապահն ինքնաթիռի զուգարանում ատրճանակ է մոռացել, ինչն իրարանցում է առաջացրել. The Sun (լուսանկարներ)

British Airways ավիաընկերության ինքնաթիռի ուղևորներից մեկն ինքնաթիռի զուգարանում լիցքավորված ատրճանակ է գտել, որն այնտեղ էր մոռացել Մեծ Բրիտանիայի նախկին վարչապետ Դևիդ Քեմերոնի թիկնապահը: Այս մասին գրում է The Sun պարբերականը` հղում անելով ինքնաթիռի ուղևորներից մեկին:

Դեպքը տեղի է ունեցել փետրվարի 3-ին` Նյու Յորքից Լոնդոն չվերթի ժամանակ: Պարբերականի տվյալներով` ենթադրաբար Դևիդ Քեմերոնը կնոջ` Սամանթայի հետ հանգստյան օրերն անցկացրել է Նյու Յորքում:

Հաղորդվում է, որ մինչև թռիչքը, ինքնաթիռի ավագ օդաչուն տեղեկացրել է ուղևորներին, որ չվերթը հետաձգվում է` ուղևորներից մեկի հետ տեղի ունեցած պատահարի պատճառով:

«Մենք սպասում էինք թռիչքին, երբ ինչ-որ տղա սկսեց իր հեռախոսից ատրճանակի և երկու անձնագրերի նկարներ ցույց տալ, որոնք, իր խոսքերով, նա գտել է զուգարանում: Անձնագրերից մեկը Դևիդ Քեմերոնինն էր»,- պատմել է ուղևորներից մեկը:

Զենքը գտած ուղևորը միանգամից դիմել է ինքնաթիռի անձնակազմին: Պարբերականի ևս մի աղբյուր նշել է, որ ավագ օդաչուն եկել է ուղևորների մոտ և հաստատել է, որ ինքնաթիռում զենք է գտնվել: Նա նաև տեղեկացրել է, որ անձնական թիկնապահներին թույլատրվում է ինքնաթիռ զենք բերել: Թե ինչու էր Քեմերոնի անձնագիրը թիկնապահի մոտ, անհայտ է:

Ինչպես տեղեկացրել է ավիաընկերությունը, ինքնաթիռի անձնակազմը դեպքը հարթել է մինչև թռիչքը: Լոնդոնի ոստիկանությունում, որտեղ աշխատում է Քեմերոնի թիկնապահը, տեղեկացրել են, որ վերջինս «ազատվել է օպերատիվ պարտականություններ կատարելուց»: