Բրիտանիայում մտադիր են 2035 թվականին արգելել բենզինային, դիզելային եւ հիբրիդային մեքենաների վաճառքը

Բրիտանական իշխանությունները մտադիր են 2035 թվականին երկրի տարածքում արգելել բենզինային եւ դիզելային շարժիչներով նոր ավտոմեքենաների, ինչպես նաեւ հիբրիդային մեքենաների վաճառքը: Այս մասին նշված է Միացյալ Թագավորության վարչապետ Բորիս Ջոնսոնի գրասենյակի տարածած հայտարարության մեջ, փոխանցում է ՏԱՍՍ-ը:

«Ցուցադրելով արտանետումների կրճատման ուղղությամբ Մեծ Բրիտանիայի անհետաձգելի գործողությունները՝ կառավարությունը նախատեսում է ավելի վաղ՝ 2035 թվականին դադարեցնել բենզինային եւ դիզելային շարժիչներով նոր ավտոմեքենաների եւ միկրոավտոբուսների վաճառքը, ինչպես նաեւ առաջին անգամ [արգելվածների ցանկ ներառել] հիբրիդային ավտոմեքենաները»,- նշված է Դաունինգ սթրիթի հաղորդագրության մեջ:

Բրիտանական իշխանություններն ավելի վաղ պատրաստվում էին այս արգելքը մտցնել 5 տարի ուշ՝ 2040 թվականին, իսկ հիբրիդային ավտոմեքենաների մասին խոսք չկար:

Լոնդոնը մտադիր է համանման միջոցառումներով կյանքի կոչել աշխարհում էկոլոգիայի պաշտպանության ամենախիստ օրենքներից մեկը՝ 2050 թվականին ջերմոցային գազերի արտանետումները հասցնելով զրոյի: Համապատասխան օրենսդրական նախաձեռնությունը ազգային խորհրդարան է ներկայացվել դեռեւս անցյալ տարվա հունիսին:

Ջոնսոնը երեքշաբթի Լոնդոնում պետք է հայտարարի իր կառավարության առաջնահերթությունների մասին ՄԱԿ կլիմայի փոփոխության վերաբերյալ շրջանակային կոնվենցիայի կողմերի 26-րդ համաժողովում (COP-26), որը նոյեմբերին անցկացվելու է Գլազգոյում:

«COP-26 կազմակերպությունը Մեծ Բրիտանիայի եւ ամբողջ աշխարհի երկրների համար կարեւոր հնարավորություն է ակտիվացնելու համար կլիմայի փոփոխության դեմ պայքարը»,- հայտարարելու է Ջոնսոնը եւ մյուս պետություններին կոչ է անելու հետեւել թագավորության օրինակին՝ հարյուրամյակի կեսին զրոյացնելով ջերմոցային գազերի արտանետումները:

«Չի կարող ավելի մեծ պատասխանատվություն լինել, քան մեր մոլորակի պաշտպանությունն է: 2020 թվականը պետք է լինի տարի, երբ մենք արմատապես կփոխենք գլոբալ տաքացման հետ կապված իրավիճակը, դա կլինի տարի, երբ մենք կընտրենք բոլորի համար ավելի մաքուր, ավելի կանաչ ապագա»,- նշված է գրասենյակի տարածած նրա ելույթում:

Նախորդ համաշխարհային կլիմայական COP-25 համաժողովը տեղի էր ունեցել անցյալ տարվա դեկտեմբերին Մադրիդում եւ փաստացի ձախողմամբ էր ավարտվել, քանի որ դրա մասնակիցները չէին կարողացել համաձայնեցնել ամփոփիչ հայտարարության տեքստը: Փորձաքար էր դարձել կլիմայի հարցով Փարիզի համաձայնագրի 6-րդ հոդվածը, որը նախատեսում է ջերմոցային գազերի արտանետումների կարգավորման կոնկրետ մեխանիզմների ներդրում: Եվրամիությունն ու ՄԱԿ-ն արտահայտել էին համաժողովի արդյունքներից իրենց խոր հիասթափությունը՝ հույս հայտնելով, որ Գլազգոյի համաժողովում կհամաձայնեցվի արտանետումների կրճատման երկարաժամկետ ռազմավարությունը: