Բրազիլիան հարկ չի համարում նոր կորոնավիրուսի պատճառով չեղարկել ամենամյա կառնավալը

Բրազիլիայի առողջապահության նախարարությունն անհրաժեշտ չի համարում նոր կորոնավիրուսի պատճառով չեղարկել փետրվարի վերջին անցկացվելիք հայտնի կառնավալը, հայտնում է «ՌԻԱ Նովոստի» գործակալությունը` հղում տալով Բրազիլիայի առողջապահության նախարար Էնրիկե Մանդետտայի հայտարարությանը:

«Ինչ վերաբերում է կառնավալի չեղարկմանը. սա մշակութային իրադարձություն է, որը ձևավորում է մեր ինքնությունը: Նման ենթադրություն անելու որևէ հիմք չկա, հույս ունենք, որ այդ ընթացքում մարդիկ կզվարճանան և կվայելեն տոնը»,- Twitter սոցիալական կայքում Առողջապահության նախարարությունը մեջբերում է նախարարի խոսքերը:

Ներկայում նախարարությունն ամբողջ երկրում գրանցել է նոր կորոնավիրուսով վարակման 14 կասկածելի դեպք, 13 հոգու մոտ բացառվել է հիվանդության առկայությունը, դեռևս վիրուսի որևէ հաստատված դեպք երկրում չկա:

Ինչպես ավելի վաղ նշել էր Tert.am-ը, Չինաստանում նոր կորոնավիրուսով վարակվածների թիվը հասել է 20 438-ի, 425 մարդ մահացել է:

Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին: Համաճարակը բռնկվել է 11 մլն բնակչություն ունեցող Ուհան քաղաքում:

Վերջին օրերին ամբողջ աշխարհում մարդիկ խուճապի են մատնվել սրընթաց տարածվող մահացու կորոնավիրուսի պատճառով: Հիվանդների ու զոհերի թիվն օրեցօր ավելանում է, իսկ վարակման դեպքեր են արձանագրվել նաև Չինաստանից դուրս մի շարք երկրներում, ինչը հանգեցրել է համաշխարհային խուճապի: