Պաբլո Էսկոբարի գետաձիերը գրավում են Կոլումբիան

1993թ․ կոլումբիական ոստիկանությունը չեզոքացրեց ահաբեկիչ-թմրաբարոն Պաբլո Էսկոբարին եւ բռնագրավեց նրա ունեցվածքը, որի մեջ կային բավական յուրահատուկ բաներ, օրինակ՝ արձաններով այգի, ոչ մեծ օդանավակայաններ, ավտոմեքենաների հավաքածու, ինչպես նաեւ՝ անձնական գազանանոց։ Կենդանիների մեծ մասին՝ փղերին, ընձուղտներին, ձիերին, անտիլոպներին եւ պոնիներին տեղավորեցին տեղի գազանանոցներում։ Սակայն նույն բանը չհաջողվեց անել չորս գետաձիերի հետ, որոնք իրենց գերեվարողներից պաշտպանվում էին։ Կենդանիներին որոշվեց պարզապես բաց թողնել տեղի ջունգլիներում, հայտնում է Nat- geo-ն։

Մոտ 30 տարի անց գետաձիերի թիվը Կոլումբիայում հասել է 80-ի, եւ դրանց անվանում են խոշորագույն ագրեսիվ տեսակը աշխարհում։ Կալիֆոռնիայի համալսարանի գիտնականները Սան Դիեգոյում առաջին անգամ ներկայացրել են տեղի էկոհամակարգի վրա դրանց ազդեցության գիտական գնահատականը։

Հետազոտողները երկու տարի են ծախսել ուսումնասիրելու համար ջրերի եւ միկրոբիոմների որակը, միջատների, խեցգետնակերպերի եւ այլ օրգանիզմների տեսակային բազմազանությունը կոլումբիական լճերում, որտեղ ապրում են գետաձիերը։ Այս տվյալները նրանք համեմատել են մոտակա ջրամբարների ցուցանիշների հետ, որտեղ գետաձիեր դեռեւս չկան։

Բնապահպանները գետաձիերին դասակարգում են որպես էկոինժեներներ։ Դա նշանակում է, որ նրանք սննդամթերքը ցամաքից ջրամբարներ են տեղափոխում։ Օրվա ընթացքում յուրաքանչյուր մեծահասակ գետաձի ուտում է 50-100 կգ բույս, իսկ գիշերը հանգստանում է ջրի մեջ, որտեղ լցվում է նրա արտաթորանքը։

Գիտնականները պարզել են, որ գետաձիերի կղանքը փոխում է ջրի քիմիական բաղադրությունը, թթվածնի եւ ածխածնի մակարդակը, ինչպես նաեւ նպաստում է վնասակար ջրիմուռների եւ մանրէների տարածմանը։ Նրանք բացատրում են, որ գետաձիերի հետագա տարածումը կնպաստի ջրիմուռների ծաղկմանը, որը մեծ սպառնալիք կդառնա տարածաշրջանի համար։ Աշխատանքի հեղինակները կանխատեսում են, որ Կոլումբիայի գետաձիերը կշարունակեն ակտիվորեն բազմանալ։

Հետազոտության հեղինակները նշում են, որ գետաձիերի հետ բախումը վտանգավոր է մարդու կյանքի համար, եւ այդ կենդանիներին շատ դժվար է բռնել։ Նրանք Կոլումբիայում գետաձիերի դեմ պայքարի հստակ գաղափար չեն առաջարկում, սակայն նշում են, որ խնդիրը, հավանաբար, ավելի հեշտ է լուծել երբ դեռ դրանք 80-ն են, ոչ թե հազարավորները։

Մի քանի տարի առաջ Կոլումբիայի իշխանությունները գետաձիերին բռնելու եւ ստերջացնելու որոշում էին կայացրել, սակայն այդ նախաձեռնությունը տապալվեց այն բանից հետո, երբ պարզվեց, որ գետաձիու մեկ ձագին բռնելու համար շատ ժամանակ, ջանքեր եւ 25 000 դոլար է պահանջվում։