Փոխադարձ վիրավորանքներ. Թրամփը Բլումբերգին «կարճահասակ Մայք» է անվանել, միլիարդատերը նախագահին՝ «պաթոլոգիկ ստախոս»

Միացյալ Նահանգների նախագահ Դոնալդ Թրամփն ու Նյու Յորքի նախկին քաղաքապետ Մայքլ Բլումբերգը, որոնք գտնվում են քաղաքական հակադիր ճամբարներում, վիրավորանքներով են փոխանակվել:

Ինչպես նշում է theguardian.com-ը, ամեն ինչ սկսվել է Թրամփի՝ Fox News-ին տված հարցազրույցից: Երբ լրագրողը հետաքրքրվել է՝ ինչ է նախագահը մտածում, երբ լսում է քաղաքական մրցակիցների անունները, Թրամփն ասել է. «Բլումբերգի դեպքում՝ շատ կարճահասակ, փոքրիկ Մայք»:

Թրամփը հավելել է, որ միլիարդատեր Մայքլ Բլումբերգն իր հասակի պատճառով առանձնահատուկ վերաբերմունք է պահանջում Դեմոկրատական կուսակցության նախագահական քարոզարշավների ժամանակ:

«Իսկ հիմա էլ արկղ է պահանջում, որպեսզի բանավեճերի ժամանակ կանգնի դրա վրա: Դե ինչ, դա նորմալ է, դրանում ոչ մի վատ բան չկա, դու կարող ես նաև կարճահասակ լինել»,-ասել է ԱՄՆ ղեկավարը:

Նա հավելել է, որ նախագահական մրցապայքարի շրջանակում մեծ սիրով կպայքարեր Բլումբերգի դեմ:

Նախագահի հնչեցրած խոսքերին ի պատասխան Բլումբերգն իր ներկայացուցչի միջոցով Թրամփին «պաթոլոգիկ ստախոս» է անվանել:

«Նա ստում է ամեն ինչի վերաբերյալ՝ իր կեղծ մազերի, գիրության և արհեստական արևայրուքի»,- ասել է ներկայացուցիչը:

«Ընտրապայքարում ես նրանից երկու անգամ ավելի բարձր կլինեմ, և Թրամփը գիտի, որ կարող եմ հաղթել նրան»,- լրագրողների հետ զրույցում ասել է Բլումբերգը: