Ֆրանսիան Ուհանից տարհանել է 30 երկրների քաղաքացիներին

30 երկրների քաղաքացիներ գտնվում են ֆրանսիական երկրորդ չվերթում, որը մեկնել է Չինաստանի Ուհան քաղաքից, որը համարվում է կորոնավիրուսի տարածման կենտրոնը, հայտնել է Ֆրանսիայի արտաքին գործերի նախարար Ժան Իվ Լե Դրիանը, հաղորդում է ՌԻԱ Նովոստի-ն:

Առաջին չվերթով Ֆրանսիան Ուհանից տարհանել էր շուրջ 200 համաքաղաքացիներին: Նրանք ուրբաթ ժամանել էին Ֆրանսիայի հարավում գտնվող Իսթր քաղաքի օդանավակայան: Բոլոր ժամանածներն այժմ գտնվում են երկու շաբաթ տեւողությամբ կարանտինում: Երկրորդ չվերթը պետք է Ֆրանսիա ժամանի կիրակի:

«Երկրորդ չվերթով ժամանելու են 30 տարբեր ազգությամբ բազմաթիվ եվրոպացիներ»,-ասել է Լե Դրիանը RTL ռադիոկայանի եթերում:

«Մենք ստանձնել ենք մեր պատասխանատվությունը (օգնել տարհանել ուրիշ եվրոպական երկրների քաղաքացիներին՝ խմբ.) եւ համերաշխ ենք եվրոպացիների հետ: Նրանց մեծամասնությունը կվերադառնա իրենց երկրներ ժամանելուց (Ֆրանսիա՝ խմբ.) անմիջապես հետո»,-նշել է նա:

Դեկտեմբերի 31-ին Չինաստանի իշխանությունները տեղեկացրել էին Առողջապահության համաշխարհային կազմակերպությանը (ԱՀԿ) երկրի կենտրոնական մասում գտնվող Ուհան քաղաքում անհայտ թոքաբորբի բռնկման մասին, որն այժմ հայտնի է որպես 2019-nCoV կորոնավիրուս:

Նոր կորոնավիրուսի հետեւանքով Չինաստանում արդեն զոհվել է 304 մարդ, վարակված է շուրջ 14.4 հազար մարդ: Եւս 100 մարդ Չինաստանի սահմաններից դուրս շուրջ 20 երկրում վարակված է այդ հիվանդությամբ: ԱՀԿ-ը ճանաչել է համաճարակը որպես միջազգային նշանակություն ունեցող արտակարգ դրություն:

Լուրեր Հայաստանից - NEWS.am