«Քիչ ժամանակ է մնացել կլիմայի բարելավմանն ուղղված գործողություններ ձեռնարկելու համար». Գրետա Տունբերգի ելույթը Դավոսում (տեսանյութ)

Շվեդ աշակերտուհի և բնապահպանական ակտիվիստուհի Գրետա Տունբերգն այլ պատանի ակտիվիստների հետ ելույթ է ունեցել Դավոսում, որտեղ այսօր պաշտոնապես մեկնարկում է համաշխարհային տնտեսական համաժողովը: Նրա ելույթը ներկայացրել է The Guardian պարբերականը:

Տունբերգը ներկայացրել է Կլիմայի փոփոխության հարցերով փորձագետների միջազգային խմբի (IPCC) ուսումնասիրության տվյալները, որոնք ցույց են տալիս, թե որքան քիչ ժամանակ է մնում կլիմայի բարելավմանն ուղղված գործողություններ ձեռնարկելու համար, քանի որ կա 67% հավանականություն օդի համաշխարհային ջերմաստիճանի բարձրացումը 1,5%-ից ցածր պահելու համար:

Ակտիվիստուհին նշել է, որ այս թվերը ցույց են տալիս, որ եկող սերունդները խնդիրներ են ունենալու մթնոլորտում ածխաթթու գազի առկայության հետ կապված:

«Ես այս թվերը ներկայացրել եմ վերջին 18 ամիսների իմ բոլոր ելույթներում: Ես գիտեմ, որ դուք չեք ցանկանում հրապարակել այս թվերը, բայց ես այնքան կասեմ, մինչև դուք դա անեք»,- նշել է Տունբերգը:

Նա նշել է նաև, որ կլիմայի բարելավման ոլորտում դեռ ոչինչ չի արվել, և համաշխարհային արտանետումների քանակը շարունակում է աճել:

Հիշեցնենք, որ 16-ամյա Գրետա Տունբերգը համաշխարհային էկոլոգիական շարժման առաջնորդն էր դարձել ՄԱԿ-ի կլիմայի հարցերին նվիրված գագաթնաժողովում իր ելույթից հետո, որի ժամանակ մեղադրել էր երկրների ղեկավարներին և պաշտոնյաներին՝ կլիմայական ճգնաժամը կանխելու համար անհրաժեշտ քայլեր չձեռնարկելու և գիտական փաստերն արհամարհելու համար, որոնք հաստատում են վերահաս էկոլոգիական աղետը: