Սաուդյան Արաբիայի իշխանությունները ԱՄՆ-ին մոտ 500 մլն դոլար են վճարել երկրում ամերիկյան զորքեր տեղակայելու համար

Սաուդյան Արաբիայի իշխանությունները ԱՄՆ-ին մոտ 500 մլն դոլար են վճարել այս երկիր ամերիկյան զորքի եւ ռազմական տեխնիկայի տեղափոխման ու տեղակայման ծախսերի փոխհատուցման հաշվին: Այս մասին CNN հեռուստաընկերությանը հայտնել է ԱՄՆ պաշտպանության նախարարության պաշտոնական ներկայացուցիչ Ռեբեկա Ռեբարիխը:

Նրան կրկնակի դիմել են հստակեցնելու համար Fox News-ի հետ հարցազրույցում նախագահ Դոնալդ Թրամփի խոսքը, որը հրապարակվել էր հունվարի 10-ին: Թրամփն այդ ժամանակ հայտնել էր, որ Իրաքից ամերիկյան զորքը դուրս բերելու դեպքում ԱՄՆ-ն հնարավորություն ունի այդ երկրից փոխհատուցում վերցնելու ռազմաբազաների եւ Բաղդադում դեսպանության կառուցման համար: Որպես Սպիտակ տան այդպիսի մոտեցման մի օրինակ նշվել էր Էր Ռիադի հետ ռազմական համագործակցությունը: «Մենք զորք ենք ուղարկել Սաուդյան Արաբիա, որը դրա համար մեզ վճարել է: Նրանք արդեն բանկում 1 մլդ դոլարի ավանդ են կատարել»,- ասել էր պետության ղեկավարը:

«Գործընկերների մասնակցության մասնաբաժնի ընդլայնման մասին ԱՄՆ նախագահի ցանկության համաձայն՝ պաշտպանության նախարարությունը Սաուդյան Արաբիայի հետ փոխգործակցում է այդ տեղակայման ծախսերի բաշխման հարցում, որը կոչված է ամրապնդելու տարածաշրջանային անվտանգությունը եւ վերացնելու ագրեսիայով ուղեկցվող թշնամությունը: Սաուդյան Արաբիայի իշխանությունները համաձայնվել են օգնել մարել այդ գործողությունների արժեքը եւ կատարել են առաջին վճարումը»,- տեղեկացրել է Ռեբարիխը: Նրա խոսքով՝ 2019 թվականի դեկտեմբերին կատարված առաջին վճարման չափը կազմել է մոտ 500 մլն դոլար:

Անցյալ տարվա հոկտեմբերի 11-ին Պենտագոնը հայտարարել էր, որ ԱՄՆ-ն Սաուդյան Արաբիա է տեղափոխում լրացուցիչ 3 հազար զինծառայողի, կործանիչների 2 էսկադրիլիա, էքսպեդիցիոն ավիաթեւ, Patriot զենիթահրթիռային համալիրների 2 գումարտակ եւ THAAD հակահրթիռային պաշտպանության համակարգ: ԱՄՆ վարչակազմն այսպիսի որոշում էր ընդունել այն բանից հետո, երբ սեպտեմբերի 14-ի գիշերը անօդաչու թռչող սարքերի միջոցով հարվածներ էին հասցվել սաուդյան ազգային նավթային ընկերություն Saudi Aramco-ի 2 ձեռնարկություններին: Այս հարձակման պատասխանատվությունը ստանձնել էին «Անսար Ալլահ» եմենյան խռովարար շարժման ներկայացուցիչները: