Ռուսական Սու-57 մարտական ինքնաթիռները մարտունակ չեն

Ամերիկյան «National Interest» հայտնի պարբերականը հայտարարել է, որ ռուսական Սու-57 մարտական ինքնաթիռները լիարժեք մարտունակ չեն, քանի որ կրիտիկական թերություններ ունեն։ Պարբերականը ռուսական ինքնաթիռը համեմատության մեջ է դրել ամերիկյան համարժեքների հետ։

ԱՄՆ զինված ուժերի սպառազինության մեջ գտնվող «F-22 Raptor» ու նորագույն «F-35 Lightning II» ինքնաթիռների հետ հնարավոր մարտում, ըստ պարբերականի, ռուսական ինքնաթիռները կործանարար պարտություն կկրեն։

Անբավարար ֆինանսավորում, մշակումների ձգձգում, սերիական արտադրության բացակայություն, սերիական շարժիչների բացակայություն, սպառազինության և կառավարման համակարգերի թերհամալրվածություն․ ամերիկյան պարբերականը թվարկում է այս բոլոր թերությունները որպես սկզբունքային։

Համեմատելով ռուսական և ամերիկյան ռազմաօդային ուժերը՝ պարբերականը եզրակացնում է, որ չնայած Ռուսաստանն ունի հազարավոր ինքնաթիռներ, բայց դրանցից ոչ մեկը 5-րդ սերնդի սերիական կործանիչ չէ։ Իսկ ամերիկյան սպառազինության մեջ, ըստ պարբերականի, այդպիսի մի քանի հարյուր ինքնաթիռ կա։

Հիշեցնենք, որ Սու-57 ինքնաթիռներչը ռուսական նորագույն կործանիչ ինքնաթիռներ են, որոնցից արտադրվել է ընդամենը մի քանի հատ։ Դրանք որոշ փորձարկում են անցել նաև Սիրիայում, սակայն դեռ չեն համապատասխանում սերիական արտադրության ներգրավվելու մակարդակին։