Աբխազիայի նախագահական նստավայրի շենքը շարունակում է ընդդիմության վերահսկողության տակ գտնվել

Աբխազիայի նախագահական նստավայրի շենքը շարունակում է ընդդիմության վերահսկողության տակ գտնվել, հայտնում է «ՌԻԱ Նովոստի» գործակալության թղթակիցը դեպքի վայրից:

Շենքի մուտքի մոտ այժմ գտնվում են ընդդիմության մի քանի տասնյակ կողմնակիցներ և նրանց մեքենաները: Նրանք ուրախությամբ քննարկում են վերջին իրադարձությունները: Իսկ ահա շենքում ընդդիմադիրները զբաղեցրել են մի քանի աշխատասենյակ:

Նախագահականի որոշ սենյակներում իսկական քաոս է տիրում` իրերը դեսուդեն նետված են, կահույքը` շրջված, պատուհանները` կոտրված, պատուհանների տակ աղբ է թափված, դատարկ շշեր:

Ընդդիմադիր «Միացյալ Աբխազիա» քաղաքական կուսակցության նախագահ Սերգեյ Շամբան «Sputnik-Աբխազիա» գործակալությանը հայտնել է, որ ցուցարարները չեն լքի շենքն այնքան ժամանակ, քանի դեռ նախագահ Ռաուլ Խաջիմբան վայր չի դրել լիազորությունները:

Միևնույն ժամանակ, ընդդիմության կողմնակիցների շրջանում տոնական տրամադրություն է տիրում: Հիշեցնենք, որ ուրբաթ Աբխազիայի գերագույն դատարանը չեղարկել է առաջին ատյանի դատարանի որոշումը, որն ուժի մեջ էր թողել 2019 թվականի աշնանն անցկացված նախագահական ընտրությունների արդյունքները, որում հաղթանակ էր տարել Խաջիմբան, և նոր ընտրությունների անցկացման որոշում կայացրել:

Ինչպես ավելի վաղ հայտնել էր Tert.am-ը, Աբխազիայի խորհրդարանը քվեարկել է նախագահ Ռաուլ Խաջիմբայի հրաժարականի օգտին: Ավելի վաղ Խաջիմբան հրաժարվել էր լքել նախագահի պաշտոնը, սակայն ընդդիմության հետ բանակցությունների պատրաստակամություն էր հայտնել:

Նախագահի հրաժարականը պահանջում են ցուցարարները, որոնք ներխուժել են նստավայր և շրջափակել այն:

Խաջիմբան Անվտանգության խորհրդի արտակարգ նիստ էր հրավիրել և նշել, որ անհրաժեշտության դեպքում հանրապետությունում հնարավոր է արտակարգ դրություն մտցվի:

Ուժայիններն ուժեղացված ծառայության են անցել: