Ուզբեկստանում Գուլնարա Քարիմովայի գործով նոր դատավարություն է սկսվել

Ուզբեկստանում չորեքշաբթի սկսվել են դատական լսումեր Ուզբեկստանի նախկին նախագահի դստեր՝ Գուլնարա Քարիմովայի հերթական քրեական գործով, տեղեկացրել է հանրապետության Գերագույն դատարանի մամուլի ծառայությունը։

«Այսօր Տաշքենդի քաղաքային դատարանը սկսել է Գուլնարա Քարիմովայի եւ այլ անձանց քրեական գործով դատական լսումները»,- ասվում է հաղորդագրությունում։

Դատը դռնփակ է, տեղեկացնում է «Ինտերֆաքսը»։

Երկու օր առաջ Ուզբեկստանի գլխավոր դատախազությունը տեղեկացրել էր Քարիմովայի դեմ նոր քրեական գործի հետաքննության ավարտի մասին, որը հարուցվել էր 2019 թվականի դեկտեմբերի սկզբին կազմակերպված հանցավոր խումբ ստեղծելու պատճառով, որը զբաղվում էր արդյունաբերական ձեռնարկությունների զավթումներով։ Վախեցնելով տարբեր կազմակերպությունների սեփականատերերին՝ խմբավորումը, քննության տվյալներով, ստիպում էր գործարարներին վերաձեւակերպել գույքը Քարիմովային ենթակա ընկերությունների անունով։ Հասցված վնասի գումարը կազմել է ավելի քան 165 մլն դոլար եւ 85 մլրդ սում (9 մլն դոլար)։ Գործի շրջանակում Քարիմովային ներկայացվել է մեղադրանք դրամաշորթության, յուրացման միջոցով հափշտակման կամ վատնման, Ուզբեկստանի շահերի դեմ գործարքի կնքման եւ հանցավոր խմբավորում ստեղծելու մեղադրանք։ Բացի այդ, 2019 թվականի օգոստոսին Ուզբեկստանի գլխավոր դատախազությունը քրեական գործեր է հարուցել Քարիմովայի դեմ պետական միջոցների հափշտակման եւ հանրապետության շահերի դեմ գործարքներ կնքելու մեղադրանքներով։

Գուլնարա Քարիմովան 2015 թվականի օգոստոսին դատապարտվել է դրամաշորթության եւ հարկերի վճարումից խուսափելու համար, նրա դեմ հետաքննվում է քրեական գործ մի շարք այլ մեղադրանքներով, 2017-ի դեկտեմբերի 18-ին եւս մեկ քրեական գործի շրջանակում նրան նշանակվել է վերջնական պատիժ՝ 10 տարի ազատազրկում։ Սակայն, «մարդասիրություն ցուցաբերելով եւ ուշադրության առնելով դատապարտյալի՝ հափշտակածը վերադարձնելու եւ պետությանը հասցված վնասը վերականգնելու պարտավորվածությունը, 2018 թվականի հուլիսի 1-ին դատարանը նրա ազատազրկման ժամկետն իջեցրել է 5 տարվա։

Նախկին նախագահի ավագ դստեր հասցրած վնասի ընդհանուր գումարը քրեական երկու գործով կազմել է մոտ 2 մլրդ դոլար։ Ուզբեկստանը նախաձեռնել է խմբի ակտիվների կալանավորում 12 երկրներում, այդ թվում Ռուսաստանում, ավելի քան 1,5 մլրդ դոլար ընդհանուր գումարով։

2017 թվականի դեկտեմբերին ԱՄՆ ֆինանսների նախարարությունը Քարիմովային մտցրել է «Մագնիտսկու գլոբալ օրենքի» պատժամիջոցների ենթարկվածների ցուցակում։ Ֆինանսների նախարարության տվյալներով՝ Քարիմովան «գլխավորել է կազմակերպված հանցավորության հզոր սինդիկատ, որը պետական սուբյեկտներին ներգրավել է բիզնեսի էքսպրոպրիացիայի մեջ, մոնոպոլացրել է շուկան, կաշառքներ վերցրել» եւ զբաղվել «դրամաշորթությամբ»։