Վալվերդեն Վիդալին խնդրել է չհեռանալ Բարսելոնայից

«Բարսելոնայի» կիսապաշտպան Արտուրո Վիդալն, ամենայն հավանականությամբ, չի հեռանա ակումբից ձմեռային տրանսֆերային պատուհանի ընթացքում:

Այս մասին հայտնում է Sport.es-ը:

Աղբյուրի փոխանցմամբ, կատալոնական ակումբի գլխավոր մարզիչ Էռնեստո Վալվերդեն դիմել է չիլիացի ֆուտբոլիստին և խնդրել նրան մնալ թիմում գոնե մինչև ընթացիկ մրցաշրջանի ավարտը՝ նրան մնացած խաղերում խաղաժամանակ երաշխավորելով:

Կատալոնական ակումբում վստահ են, որ նրանք կկարողանան պահպանել Վիդալին:

Ավելի վաղ հաղորդվում էր, որ 32-ամյա ֆուտբոլիստը կարող է տեղափոխվել Միլանի «Ինտերը», որն անցած ամառ արդեն «Բարսելոնային» առաջարկ էր արել Վիդալի շուրջ: Արտուրոյի ծառայություններով հետաքրքրված է անձամբ «Ինտերի» գլխավոր մարզիչ Անտոնիո Կոնտեն, որը նրան ծանոթ է «Յուվենտուսում» համատեղ աշխատանքի շնորհիվ:

Ընթացիկ մրցաշրջանում Վիդալն իսպանական Պրիմերայի 15 հանդիպման է մասնակցել, որոնցում դարձել է 6 գոլի հեղինակ: