«Դու, ինչ է, կատակո՞ւմ ես». ամերիկացի լրագրողը պատմել է Թրամփի արձագանքի մասին, երբ վերջինս իմացել է, որ զանգ է բաց թողել Պուտինից

ԱՄՆ նախագահ Դոնալդ Թրամփը 2017 թվականին նախատել է Պենտագոնի հետախուզության վարչության տնօրեն Մայքլ Ֆլինին և Սպիտակ տան բարձրաստիճան պաշտոնյաներին, քանի որ նրանք իրեն տեղյակ չէին պահել Ռուսաստանի նախագահ Վլադիմիր Պուտինի զանգի մասին: Այս մասին, ինչպես տեղեկացնում է Business Insider-ը, ասված է ամերիկացի լրագրող Փիթեր Բերգենի «Թրամփն ու իր գեներալները. քաոսի գինը» նոր գրքում:

Բերգենը նշում է, որ 2017 թվականի հունվարի 27-ին Թրամփը Սպիտակ տանը ճաշելիս է եղել Մեծ Բրիտանիայի վարչապետ Թերեզա Մեյի հետ: Մեյը հարցրել է Թրամփին` արդյոք ԱՄՆ նախագահին չի զանգահարել Վլադիմիր Պուտինը, ինչին ի պատասխան Թրամփը բացասական շարժել է գլուխը: Այդ ժամանակ Ֆլինը, որը կանգնած է եղել նախագահի կողքին, խոնարհվել է դեպի նա և տեղեկացրել, որ ՌԴ նախագահը զանգահարել է մի քանի օր առաջ:

Հիասթափվելով այդ պատասխանից` Թրամփը քննադատել է Ֆլինին և Սպիտակ տան մյուս աշխատակիցներին:

«Դու, ինչ է, կատակո՞ւմ ես: Վլադիմիր Պուտինը փորձել է ինձ զանգահարել, և դու չե՞ս միացրել: Ինչի՞ մասին էիր մտածում»,-Թրամփի խոսքերը մեջբերվել են գրքում:

Ֆլինը փորձել է արդարանալ, որ այդ օրերին շատ զանգեր են ստացվել Սպիտակ տուն, սակայն ԱՄՆ նախագահը չի ցանկացել լսել նրան:

Ըստ Բերգենի` ԱՄՆ նախագահը Պուտինին անվանել է «միակ մարդը, որ կարող է վերացնել ԱՄՆ-ն», և չի ընդունել իր աշխատակազմի որոշումը՝ հետաձգել Պուտինի հետ իր հեռախոսային զրույցը:

Թոշակի անցած գեներալ-լեյտենանտ Մայքլ Ֆլինը 2017 թվականի հունվարի 20-ից փետրվարի 13-ը եղել է ԱՄՆ նախագահի ազգային անվտանգության հարցերով խորհրդականը: