Blooomberg-ը տեղեկացել է, թե Թրամփն ինչպես է որոշել տալ Սոլեյմանիին սպանելու հրամանը

ԱՄՆ նախագահ Դոնալդ Թրամփի թիմը ծննդյան եւ ամանորյա տոներին հաղորդակցության պաշտպանված միջոցներով քննարկել է իրանցի գեներալ Ղասեմ Սոլեյմանիի սպանության նպատակով հրթիռային հարվածի հնարավորությունը, հայտնում է Blooomberg-ը՝ վկայակոչելով աղբյուրներին:

Գործակալության տեղեկություններով՝ Թրամփը Սոլեյմանիի ոչնչացման որոշում է ընդունել դեկտեմբերի 27-ին ԱՄՆ ռազմակայանի վրա հարձակումից հետո, որի հետեւանքով զոհվել էր ամերիկացի պայմանագրային զինծառայող: ԱՄՆ նախագահը հարձակման պատճառով բարձրաստիճան օգնականներին հանձնարարել է սկսել գեներալի վրա ավիահարվածի մշակումը, հստակեցնում է Bloomberg-ը: Նրանց թվում էին ազգային անվտանգության հարցերով խորհրդական Ռոբերտ Օ՛Բրայենը, պետքարտուղար Մայք Պոմպեոն, որը չեղարկել էր ԱՊՀ երկրներ ուղեւորությունը, եւ փոխնախագահ Մայք Փենսը: Գործակալության աղբյուրները պարզաբանում են, որ մինչեւ միջադեպը Թրամփի վարչակազմը դիմել է Ֆրանսիային եւ մյուս դաշնակիցներին՝ խնդրելով Թեհրանին նախազգուշացնել զերծ մնալ ամերիկացի քաղաքացիների սպանությունից:

Մինչ վարչակազմը հարվածը ծրագրում էր, Թրամփը զբաղված էր նրանով, ինչն արտաքուստ նման էր նրա սովորական արձակուրդային գործունեությանը: Մասնավորապես՝ Ծննդյան տոներից հետո նա պարբերաբար մեկնում էր Մար ա Լագոյի իր մասնավոր նստավայր: Գործակալությունը նշում է, որ պատրաստվող հարվածի մասին չեն տեղեկացրել Կոնգրեսին, արտասահմանյան իշխանություններին եւ անգամ Սպիտակ տան հասարակայնության հետ կապերի համար պատասխանատու աշխատակիցներին:

Bloomberg-ի աղբյուրներից մեկը հայտնել է, որ ամերիկացի զինվորականները նախքան հարձակումը կոնկրետ Սոլեյմանիին չեն հետեւել, սակայն հրթիռակոծությունը գործարկվել է, երբ հետախուզությունից հայտնել են, որ իրանցի գեներալը, հավանաբար, Բաղդադի օդանավակայանում է: Գործակալության եւս երկու զրուցակից պնդում է, որ ԱՄՆ-ն ստույգ տեղյակ էր, երբ է Լիբանանից կամ Սիրիայից ժամանած Սոլեյմանին վայրէջք կատարել Բաղդադում:

Սոլեյմանին, որը «Ալ Ղուդս» էլիտար ստորաբաժանման հրամանատարն էր, սպանվել էր հունվարի 3-ի գիշերը Բաղդադի միջազգային օդանավակայանի շրջանում ԱՄՆ ավիահարվածի հետեւանքով: Միջադեպը մեկնաբանելիս Թրամփը գեներալին անվանել է «աշխարհի թիվ մեկ ահաբեկիչ»: Իրանը Սոլեյմանիի սպանությունը համեմատել է պատերազմ հայտարարելու հետ եւ պատասխան միջոցներ խոստացել: