Թրամփին հեռախոսով չեն միացրել Պուտինին. նա հայհոյել է անձնակազմին ու նախկին խորհրդականին

ԱՄՆ նախագահ Դոնալդ Թրամփը հայհոյել է ազգային անվտանգության հարցերի նախկին խորհրդական Մայքլ Ֆլինին եւ այլ բարձրաստիճան աշխատակիցների այն բանի համար, որ իրեն հեռախոսով չեն միացրել ռուս պաշտոնակցի՝ Վլադիմիր Պուտինի հետ պաշտոնի անցնելուց անմիջապես հետո, տեղեկացնում է Business Insider-ը։

«Թրամփն ու նրա գեներալները. քաոսի գինը» գրքում լրագրող Փիթեր Բերգենը գրել է ԱՄՆ նախագահի ու նրա աշխատակիցների խոսակցության մասին, որի մանրամասները ստացվել էին Սպիտակ տան ներկա եւ նախկին աշխատակիցների հետ տասնյակ հարցազրույցների ընթացքում։

2017 թվականի հունվարի 27-ին, նախագահական ընտրություններում հաղթանակից մի քանի շաբաթ հետո, Թրամփը Սպիտակ տանն ընդունեց առաջին պաշտոնական հյուրին՝ Բրիտանիայի վարչապետ Թերեզա Մեյին։

Բերգենի խոսքով՝ ճաշի ժամանակ Մեյը հարցրել է Թրամփին՝ խոսե՞լ է նա արդյոք Պուտինի հետ, ինչի պատասխանը ժխտական էր։

Մայքլ Ֆլինը, որը գտնվում էր նրանց կողքին, ասել է, որ աշխատակազմն աշխատում է այդ զանգի կազմակերպման ուղղությամբ։ «Նախագահ Պուտինը զանգահարել է մի քանի օր առաջ, բայց մենք չենք կարողացել միանալ նրան, զանգերի ժամանակացույց առայժմ չկա»։

Թրամփը, զայրացած պատասխանից, քննադատել է Ֆլինին։ «Ի՞նչ է, կատակո՞ւմ ես։ Վլադիմիր Պուտինը փորձել է ինձ զանգահարել, իսկ դուք չե՞ք միացրել։ Ինչի՞ մասին էիր մտածում, գրողը տանի»,- ասել է Թրամփը։

«Դե, սըր, դուք գիտեք, որ շատ զանգեր եք ունենում»,- պատասխանել է Ֆլինը։ Թրամփը Պուտինին անվանել է «միակ մարդը երկրագնդում, որը կարող է վերացնել մեզ», իսկ հետո կասկածի տակ է դրել իր անձնակազմի որոշումը՝ հետաձգել հեռախոսազրույցը։

«Ինչպե՞ս կլինի, Պուտինն ինձ զանգահարում է, իսկ դուք չեք միացնում։ Ես չգիտեմ, թե ինչ եք անում, տղաներ»,- մասնավոր կարգով ասել է Թրամփն իր ավագ աշխատակիցներին։