Ղազախստանի ՆԳՆ ղեկավարը նշել է Bek Air ինքնաթիռի կործանման 3 վարկած

Ղազախստանի ներքին գործերի նախարար Երլան Թուրգումբաեւը նշել է Bek Air ինքնաթիռի կործանման 3 վարկած, տեղեկացնում է Tengrinews.kz-ը։

«Այժմ ՆԳՆ քննչական խումբը հետաքննում է ավիաաղետը, որը տեղի է ունեցել Ալմաթիում։ Ներկայում քննարկվում է երեք վարկած։ Առաջին՝ անձնակազմի սխալը։ Երկրորդ՝ ինքնաթիռի տեխնիկական անսարքությունը։ Երրորդ՝ նավիգացիոն ծառայությունների աշխատանքը»,- ասել է ՆԳՆ ղեկավարը լրագրողներին կառավարության նիստի կուլուարներում։

«Ներկայում զննվում է պատահարի վայրը, կատարվում է ինքնաթիռի ապամոնտաժում։ Այն կտեղափոխվի օդանավակայանի տարածք, որտեղ ավելի հանգամանալից զննման կենթարկվի»,- ավելացրել է նա։

Մինչ այդ տեղեկացվել էր, որ քննիչները դիտարկում են ինքնաթիռի կործանման մի քանի վարկածներ, այդ թվում օդանավի տեխնիկական անսարքությունը, եղանակային եւ օդերեւութաբանական պայմանները, ինչպես նաեւ անձնակազմի հնարավոր սխալները։