Պուտինի կենսագիրը պատմել է նրա կյանքի ամենաբնորոշ դրվագների մասին

Ռուսաստանի նախագահ Վլադիմիր Պուտինի քաղաքական ճակատագիրը նմանօրինակը չունի խորհրդային և ժամանակակից ռուսական պատմության մեջ, իսկ նրա կյանքի որոշ դրվագներ առավել ճշգրիտ են բնորոշում նրան: РИА Новости-ի հաղորդմամբ՝ նման կարծիք է հայտնել Պուտինի գերմանացի կենսագիր, քաղաքագետ և լրագրող Ալեքսանդր Ռարը:

Երբ 1999-ին Բորիս Ելցինի պաշտոնաթողությունից հետո նրան փոխարինելու եկավ կառավարության ղեկավար Վլադիմիր Պուտինն ու շուտով ընտրվեց երկրի նախագահ, Գերմանիայում լույս տեսավ Ռարի «Վլադիմիր Պուտին. «Գերմանացին» Կրեմլում» գիրքը:

«Ինձ համար այս առումով հետաքրքիր էր Պուտինների լենինգրադյան ամառանոցում 1996-ին տեղի ունեցած հրդեհը: Ես անձամբ հարցրել եմ նրան, և նա հաստատել է, որ դա տեղի է ունեցել, երբ ինքն ընկերների հետ սաունայում է եղել: Նա բարձրացել է երկրորդ հարկ, որտեղ քնած էին իր դուստրերը, դուրս է բերել նրանց և ցած նետել, որտեղ նրանց բռնել են ընկերները: Այնուհետև նա հիշել է, որ տանը պահվում են իր խնայողությունները, և նա ևս մեկ անգամ այրվող տուն է մտել և տեսել, որ ողջ գումարն այրվել է, և միայն իր խաչն էր անվնաս մնացել: Դա այնպիսի անձնական պատմություն է, որն անկեղծորեն պատմել է»,- նշել է Ռարը:

Նա պատմել է նաև, թե ինչպես է Պուտինն իր ընկերոջն ուղարկել առաջարկություն անելու իր ապագա կնոջը՝ ստուգելու վերջինիս հավատարմությունը: «Դա նույնպես Պուտինն է»,- նկատում է լրագրողը:

Ռարը զբաղվել է խորհրդային վերնախավի տարբեր գործիչների կենսագրությունների կազմմամբ, սակայն, երբ սկսել է զբաղվել Պուտինի կենսագրությամբ, հասկացել է, որ այն տարբերվող է: Նրա խոսքով՝ «Պուտինը 21-րդ դարի ամենանշանակալի քաղաքական գործիչն է, որն իր կամքի ուժով և գաղափարներով նոր երկիր է ստեղծել»:

«Նա հասարակ ընտանիքից է դուրս եկել, նրա պապը խոհարար է աշխատել ստալինյան ամառանոցում և որոշակի կապ է ունեցել հատուկ ծառայությունների հետ: Նրա աշխատանքը Գերմանիայում արտասովոր չի եղել, նա սուպերլրտես չի եղել: Նա խնդիրներ է ունեցել. նրա կինն ավտովթարի է ենթարկվել, նա կորցրել է աշխատանքը Սոբչակի՝ ընտրություններում պարտվելուց հետո: ԽՍՀՄ փլուզումից հետո նա անկում է ապրել, սակայն, այնուամենայնիվ, բարձրացել է վեր: Դա վերելքների ու անկումների դինամիկա էր` ամբողջովին տարբեր Ելցինի և այլ խորհրդային գործիչների կենսագրությունից»,- հավելել է Ռարը: