Նշվել են Ալմաթիի մոտ օդանավի վթարի վարկածները

Քննությունը Ալմաթիի մոտ օդանավի վթարի հավանական վարկածների թվում դիտարկում է տեխնիկական անսարքությունը, օդանավի վարման սխալը եւ օդերեւութաբանական անբարենպաստ պայմանները, հայտնում է «ՌԻԱ Նովոստի»-ն՝ վկայակոչելով Ղազախստանի ՆԳՆ-ին:

Երկրի ՆԳ նախարար Էռլան Թուրգումբաեւը նշել է, որ գերատեսչության աշխատակիցները ստուգում են բոլոր վերգետնյա եւ ավիացիոն ծառայությունների աշխատանքը, հարցաքննում են պատասխանատու անձանց եւ հարցում անցկացնում չվերթի ուղեւորների շրջանում:

«Քննությունն ուսումնասիրում է բոլոր փաստաթղթերը, աուդիո եւ տեսագրությունները: Նշանակվել են օդանավի վիճակի մի քանի փորձաքննություններ, այդ թվում հրդեհատեխնիկական եւ տրանսպորտա-տրասոլոգիական փորձաքննություններ»,- ասել է նա:

Օդանավից վերցվել են ինքնագրերը եւ բորտային մատյանը: Հիմա մասնագետները շարունակում են զննել վթարի շրջանը

Դեկտեմբերի 27-ի առավոտյան տեղեկություն էր ստացվել, որ 93 ուղեւորով Bek Air օդանավը, որն Ալմաթիից էր օդ բարձրացել, ռադարներից կորել է: Ավելի ուշ հրապարակվել էին կործանված օդանավի լուսանկարները: Bek Air օդանավի վթարի փաստով թեժ գիծ է բացվել: Վերջին տեղեկություններով՝ Ալմաթիում Bek Air օդանավի վթարի հետեւանքով զոհվածների թիվը հասել է 15 մարդու: