Ինչպես ճիշտ լիցքավորել սմարթֆոնը

Սմարթֆոն օգտագործողները, հեռախոսն ամբողջ գիշեր լիցքավորման թողնելով, ինչպես նաև այն 100 տոկոս լիցքավորման հասնելուց հետո չանջատելով, նվազեցնում են մարտկոցի «կյանքի տևողությունը»: Այդ մասին Business Insider հրատարակությանն ասել է BatterieIngenieure գերմանական ընկերության տնօրեն Դոմինիկ Շուլտեն:

Փորձագետի խոսքով` սմարթֆոնի «կյանքի տևողությունն» ավելի դանդաղ է նվազում 30-50 տոկոս լիցքավորման դեպքում: Նրանք նաև խորհուրդ են տալիս գաջեթներն առավոտյան լիցքավորել:

Business Insider-ի փոխանցմամբ` լիթիում-իոնային մարտկոցներն այսպես, թե այնպես քիմիական կազմի փոփոխության հետևանքով «հնանում» են, հետևաբար «ծառայելու» սահմանափակ ժամկետներ ունեն: Բացի այդ, մարտկոցն անգամ խնամքով օգտագործելը կարող է մեծ նշանակություն չունենալ ամեն երկու տարին մեկ կամ ավելի հաճախ գաջեթը փոխելու դեպքում:

Ավելի վաղ Mail.ru Hi-Tech-ի տեխնիկայի գծով փորձագիտական պորտալի ղեկավար Դմիտրի Ռյաբինինը հայտնել էր, որ սմարթֆոնը 100%-ով լիցքավորելը, ինչպես նաև սարքն ամբողջությամբ լիցքաթափելը նվազեցնում է մարտկոցի երկարաժամկետ ծառայելու հավանականությունը: