ՌԴ էներգետիկայի նախարարը հայտարարել է, որ անկախ պատժամիջոցներից` «Հյուսիսային հոսք-2» գազատարը կկառուցվի

ՌԴ էներգետիկայի նախարար Ալեքսանդր Նովակը հայտարարել է, որ «Հյուսիսային հոսք-2» գազատարը կկառուցվի անկախ պատժամիջոցներից, թեև ներկա պահին ռուսական կողմի համար պարզ չէ` կկարողանա՞ աշխատանքն ավարտին հասցնել շվեյցարական Allseas ընկերությունը: Այս մասին հայտնում է TACC գործակալությունը:

«Դեռ վաղ է խոսել այն մասին, որ Alsseas ընկերությունը չի կարողանա շարունակել աշխատանքը «Հյուսիսային հոսք-2» նախագծում: Նրանք դադարեցրել են աշխատանքը` պատժամիջոցներից խուսափելու համար: Չնայած այդ նույն պատժամիջոցներին, գազատարը կկառուցվի, մնացել է 160 կմ-ից քիչ տարածքում խողովակներ դնել»,- ասել է Նովակը:

Ավելի վաղ շվեյցարական Allseas ընկերությունը հայտարարել էր, որ դադարեցնում է աշխատանքները «Հյուսիսային հոսք-2» գազատարի կառուցման նախագծում` ԱՄՆ-ի կողմից հնչեցված պատժամիջոցների սպառնալիքների պատճառով:

Հիշեցնենք, որ Վաշինգտոնը կոչ էր արել բոլոր կողմերին դուրս գալ նախագծից: ԱՄՆ-ն «Հյուսիսային հոսք-2»-ը ոչ թե առևտրային նախագիծ է համարում, այլ «քաղաքական գործիք», որի նպատակն է ճնշում գործադրել Եվրոպայի վրա: