Խորվաթիայի նախագահական ընտրություններում առաջատարը ընդդիմության թեկնածուն է

Խորվաթիայի ընդդիմադիր Սոցիալ-դեմոկրատական կուսակցության թեկնածու Զորան Միլանովիչը կիրակի անցկացված երկրի նախագահական ընտրությունների արդյունքներով ստացել է առավել մեծ թվով ձայներ, բայց չի հավաքել ընտրողների ձայների 50 տոկոսից ավելին: Այս մասին հայտնել է երկրի Պետական ընտրական հանձնաժողովը, փոխանցում է ՏԱՍՍ-ը:

Քվեաթերթիկների 96 տոկոսի մշակման արդյունքներով՝ Միլանովիչը ստացել է ձայների 29,6 տոկոսը: Նրան հաջորդում է երկրի գործող նախագահ Կոլինդա Գրաբար-Կիտարովիչը՝ ձայների 26,77 տոկոսով: Երրորդ տեղում է երգիչ եւ երաժիշտ Միրոսլավ Շկորոն, նրա օգտին է քվեարկել ընտրողների 24,37 տոկոսը:

Թեկնածուներից ոչ մեկը չի ստացել ընտրողների ձայների 50 տոկոսից ավելին, ինչը վկայում է ընտրությունների երկրորդ փուլ անցկացնելու անհրաժեշտության մասին:

Երկրորդ փուլում, որը կանցկացվի 2020 թվականի հունվարի 5-ին, կմասնակցի երկու հավակնորդ, որոնք ընտրությունների առաջին փուլի արդյունքներով ստացել են ամենամեծ թվով ձայները: