Սոցիոլոգները պարզել են՝ ինչպես են ամերիկացիները վերաբերվում Թրամփի իմպիչմենթին

ԱՄՆ քաղաքացիների կարծիքները նախագահ Դոնալդ Թրամփի իմպիչմենթի վերաբերյալ հավասար կիսվել են: Այս մասին վկայում են Wall Street Journal եւ NBC News հեռուստաալիքների հարցման տվյալները, հաղորդում է ՌԻԱ Նովոստին:

Հարցման համաձայն՝ հարցվածների 48 տոկոսն աջակցում է իմպիչմենթին, եւս 48 տոկոսը դեմ է իմպիչմենթին:

Նշվում է, որ հարցված հանրապետականների 90 տոկոսը դեմ է Թրամփի իմպիչմենթին, այն դեպքում, երբ դեմոկրատների 83 տոկոսը կողմ է:

Հարցումն անցկացվել է դեկտեմբերի 14-17-ը եւ հրապարակվել է չորեքշաբթի՝ մինչ Ներկայացուցիչների պալատում քվեարկությունը: Մասնակցել է 900 մարդ: Վիճակագրական սխալը կազմում է մոտ 3,27 տոկոսային կետ:

Հինգշաբթի գիշեր ԱՄՆ Կոնգրեսի Ներկայացուցիչների պալատը նախագահ Դոնալդ Թրամփին իմփիչմենթ հայտարարեց երկու հոդվածով՝ «լիազորությունների չարաշահում» եւ «խոչընդոտում Կոնգրեսին»։ Դեմոկրատները հայտարարում են, որ Թրամփը ձգձգել է Կոնգրեսի հավանությանն արժանացած ռազմական օգնության տրամադրումն Ուկրաինային՝ փոխարենը պահանջելով նախագահ Վլադիմիր Զելենսկուց քաղաքական ծառայություն՝ Թրամփի ընդդիմախոս Ջո Բայդենի դեմ հետաքննություն անցկացնելու տեսքով։ Թրամփը հայտարարում է, որ ուկրաինական իշխանություններից պահանջել է միայն պայքար կոռուպցիայի դեմ։