Պուտինը պատմել է իր նախագահության ամենածանր պահերի մասին

Ռուսաստանի նախագահ Վլադիմիր Պուտինը նշել է, որ իր նախագահության տարիներին ամենածանր պահերը եղել են Բեսլանի եւ Դուբրովկայի թատերական կենտրոնի ահաբեկչությունները։ Այս մասին նա տեղեկացրել է Մոսկվայի մամուլի ասուլիսում, տեղեկացնում է ՌԲԿ-ն։

«Ամենածանր (պահերը) մեծ ահաբեկչություններն էին։ Բեսլանը։ Երբեք չեմ մոռանա։ Դուբրովկայի ահաբեկչությունը»,- ասել է նախագահը։

Անցած շաբաթ Մարդու իրավունքների խորհրդի (ՄԻԽ) նիստում Պուտինն արդեն Բեսլանի ահաբեկչությունն անվանել էր իր անձնական ցավն ամբողջ կյանքի համար։ «Դա այնպիսի ցավ է, ե՛ւ իմ անձնականը, ե՛ւ ամբողջ երկրինը։ Ամբողջ կյանքի համար»,- ասել էր Պուտինը, երբ նիստում խոսք էր բացվել ահաբեկչությունը վերապրածների խնդիրների մասին։

Պուտինի հայտարարությունը հնչել է ի պատասխան խնդրանքի՝ թվարկել իր նախագահության ամենածանր, ինչպես նաեւ ամենավառ պահերը։ Պատասխանելով հարցի երկրորդ մասին՝ նախագահը նշանակալի իրադարձությունների շարքին է դասել բնակչության աղքատության հարցի լուծումը։ Նա միեւնույն ժամանակ նշել է, որ խնդիրը վերջնականապես լուծված չէ։

«Բայց ընդհանուր առմամբ, եթե նայենք, թե ինչ էր երկիրը 2000-ականների սկզբին եւ հիմա, գրեթե երկու տարբեր երկրներ են։ Էլ չեմ ասում այն հարցերի մասին, որոնք կապված են անվտանգության հետ»,- ասաց նախագահը։

Բեսլանի ահաբեկչությունը տեղի է ունեցել 2004 թվականի սեպտեմբերի 1-ին։ Այն ժամանակ գրոհայինները թիվ 1 դպրոցում 1100 պատանդ էին վերցրել, որոնց մեծ մասը երեխաներ էին, եւ նրանց պահում էին դպրոցի ականապատ մարզադահլիճում։ Ահաբեկչության զոհ դարձավ 333 մարդ, այդ թվում 186 երեխա, որոնց մեծ մասը զոհվեց գրոհի ժամանակ։ Ավելի քան 700 մարդ տարբեր ծանրության վիրավորումներ ստացավ։

Դուբրովկայի ահաբեկչությունը տեղի է ունեցել 2020 թվականի հոկտեմբերի 23-ին։ Գրոհայինների խումբը՝ Մովսար Բարաեւի գլխավորությամբ, ներխուժեց թատերական կենտրոն, որտեղ ընթանում էր «Նորդ Օսթ» մյուզիքլը։ 40 ահաբեկիչ 900 մարդ պատանդ վերցրեց, որոնց մեջ էին հանդիսատեսներն ու դերասանները։ Երեք օր հետո տեղի ունեցավ թատերական կենտրոնի գրոհը։ Գրոհայինների գործողությունների հետեւանքով զոհվեց 130 մարդ։