Պենտագոնում մեկնաբանել են ամերիկյան ռազմաբազաների հնարավոր փակման մասին Էրդողանի խոսքերը

ԱՄՆ-ն օգտագործում է Թուրքիայի ռազմաբազաները, այդ թվում` «Ինջիրլիք» ավիաբազան, Անկարայի թույլտվությամբ: Պենտագոնում մեկնաբանել են Թուրքիայի նախագահ Ռեջեփ Թայիփ Էրդողանի խոսքերն այն մասին, որ իրենք հնարավոր է փակեն «Ինջիրլիք» և «Քուրեջիք» ամերիկյան ռազմաբազաները: Այս մասին տեղեկացնում է ՏԱՍՍ գործակալությունը:

«ԱՄՆ-ի ուժերի ներկայությունը թուրքական բազայում, այդ թվում՝ «Ինջիրլիք» բազայում, թուրքական կառավարության թույլտվությամբ է: Մենք մեր ուժերի ներկայությանը Թուրքիայում նայում ենք որպես բազմամյա համագործակցության պարտավորություն և մեր դաշնակցի պաշտպանություն ՆԱՏՕ-ի և ռազմավարական համագործակցության շրջանակում»,- տեղեկացրել է Պենտագոնի ներկայացուցիչը գործակալությանը:

Ինչպես նշել են ԱՄՆ-ի ռազմական գերատեսչությունից, Թուրքիան «իր ներդրումն ունի Աֆղանստանում, Կոսովոյում, Իրաքում անցկացվող ՆԱՏՕ-ի առաքելություններում» և կարևոր դեր ունի ԱՄՆ-ի ազգային պաշտպանության ռազմավարական նպատակներում:

«Պենտագոնը ձգտում է պահպանել այդ հարաբերությունները՝ միևնույն ժամանակ կոչ անելով Թուրքիային ավելի կառուցողական քաղաքականություն վարել C-400-ների հարցում և այլ վիճելի հարցերի շրջանակում»,- հավելել է գործակալության զրուցակիցը:

Թուրքիայում արդեն առաջին անգամ չէ, որ խոսակցություններ են շրջանառվում «Ինջիրլիք» ավիաբազան ամերիկացիների համար փակելու մասին: Սովորաբար այսպիսի խոսակցություններ Անկարայի կողմից բացվում են Վաշինգտոնից եկող սպառնալիքներից հետո, սակայն մինչ այժմ կոնկրետ քայլեր բազաների փակման ուղղությամբ չեն կատարվել:

Ինչպես ավելի վաղ տեղեկացրել էր Tert.am-ը, Թուրքիայի նախագահ Ռեջեփ Թայիփ Էրդողանը հայտարարել է, որ ի պատասխան ԱՄՆ Սենատի կողմից Հայոց ցեղասպանության ճանաչման և C-400-ների գնման պատճառով ԱՄՆ հնարավոր պատժամիջոցների, չի բացառվում, որ Թուրքիան կփակի իր տարածքում գտնվող ԱՄՆ-ի ռազմաբազաները: