Ղրղզստանի լեռնադահուկային հանգստավայրը ներկայացրել է Վլադիմիր Պուտինի բրոնզե արձանը (լուսանկարներ)

Ղրղզստանի լեռնադահուկային հանգստավայրը ներկայացրել է ՌԴ նախագահ Վլադիմիր Պուտինի բրոնզե արձանը՝ Ռուս-ղրղզական զարգացման հիմնադրամից միջոցներ ստանալուց հետո, գրում է Newsweek-ը:

Գրեթե 2,5 մետր բարձրությամբ բրոնզե արձանը «կրում» է կոստյում և հայացքը հառում Բիշքեկից մոտավորապես 29 կմ հեռավորության վրա տարածվող ձյունածածկ լեռնային համայնապատկերին:

Աղբյուրի հաղորդմամբ՝ արձանը տեղադրվել է ի նշան երախտագիտության, երբ Ռուս-ղրղզական զարգացման հիմնադրամը 1,2 մլն դոլարի չափով վարկ է տրամադրել հանգստավայրի տնօրեն Ակբար Ռոզիևին, որի խոսքով՝ մինչ այդ Ղրղզստանում բոլոր բանկերը հրաժարվել են վարկ տրամադրել իրեն հարմար պայմաններով:

«Չգիտեի՝ ինչպես շնորհակալություն հայտնել: Տրամադրված վարկի շնորհիվ այժմ ավելի լավ կենտրոն ունենք»,- հայտնել է Ռոզիևը:

Ռուս-ղրղզական զարգացման հիմնադրամը ստեղծվել է 2014 թվականին՝ երկու երկրների միջև տնտեսական հարաբերությունների զարգացման համար: