Նշվել են 2020 թվականին ճամփորդության ամենալավ վայրերը

Զբոսաշրջային Travel and Leisure պորտալը կազմել է այն վայրերի ցուցակը, որոնք արժե այցելել 2020 թվականին, տեղեկացնում է ՌԻԱ «Նովոստի»-ն։

Դրանում ընդգրկվել է 50 ուղղություն։ Առաջին տեղը փորձագետները տվել են Եթովպիայի մայրաքաղաք Ադիս Աբեբային։ Զբոսաշրջիկներին առաջարկվում է այցելել Մենելիկի պալատ, որը երկար տարիներ եղել է կայսրերի նստավայր, եւ որտեղ այսօր գտնվում է վարչապետ Աբիա Ահմեդ Ալիի գրասենյակը։ Կարելի է այցելել նաեւ Ժամանակակից արվեստի կենտրոն, որը կոչված է եթովպացի նկարիչ Զոմի անունով։ Ներկայացված են ժամանակակից աֆրիկյան արվեստի նմուշներ եւ էկոլոգիայի թեմայով նախագծեր։ Տեղեկացվում է, որ քաղաքի օդանավակայանը երեք անգամ մեծացրել է թողունակությունը։

Երկրորդ տեղում Պերուի հին քաղաք Արեկիպան է։ Դրա պատմական կենտրոնը 2000 թվականին ներառվել է ՅՈւՆԵՍԿՕ-ի համաշխարհային ժառանգության ցուցակում։ Այստեղ զբոսաշրջիկները հնարավորություն ունեն ապրելու հյուրատանը Սուրբ Ավգուստինի եկեղեցու կողքին, որը հայտնի է բարոկկո ոճի իր փորագիր ճարտարապետությամբ։

Երրորդ տեղը Աշվիլ քաղաքինն է (Հյուսիսային Կարոլինայի նահանգ), որտեղ ապրում են փողոցային նկարիչներն ու երաժիշտները։ Սեպտեմբերին այստեղ տեղի է ունենում ստեղծագործական խոհարարական փառատոն՝ «Չաու-չաու», վարպետաց դասերով, յոգայի պարապմունքներով եւ կենդանի երաժշտության համերգներով։

Առաջին տասնյակում են նաեւ Ավստրիան, Մեքսիկայի ամենահյուսիսային Ստորին Կալիֆոռնիա նահանգը, Բարբադոսը, Պեկինը, Հավայները, Բոթսվանան եւ Բոստոնը։