Կիեւում անհայտ անձինք բանկ են պայթեցրել եւ կողոպտել

Կիեւի Դնեպրյան շրջանում նոյեմբերի 30-ի առավոտյան հզոր պայթյուն է տեղի ունեցել Էնտուզիաստների 11 հասցեում։ Երկու անհայտ անձինք պայթեցրել են «Օտշչադբանկի» բաժանմունքը, հայտնում է «Ուկրաինական նորությունները»։

Դետոնացիայի հետեւանքով ցուցափեղկի ապակին եւ բանկի կահավորանքը դուրս են նետվել։

Հանցագործներին բռնելու համար Կիեւում անցկացվել է «Ազդանշան» օպերացիան։

Պայթյունը տեղի է ունեցել մոտ 4։10-ին։ Իրավապահների ունեցած տեղեկատվությամբ՝ հանցագործությունը կատարել են երկու տղամարդիկ։ Նախնական տվյալներով՝ պայթյունի ալիքի էպիկենտրոնը բանկոմատն է, որն էլ, ամենայն հավանականությամբ, եղել է գողերի նպատակը։ Սակայն ալիքն այնքան ուժեղ է եղել, որ պայթեցրել է ոչ միայն բանկոմատը, այլեւ համարյա ամբողջ բաժանմունքը՝ ներսում փլվել է առաստաղը, իսկ ցուցափեղկը դուրս է ընկել։ Բանկից 10 մետր հեռավորությամբ, հենց գազոնի վրա կարելի է եղել տեսնել 100 գրիվնայանոց բազմաթիվ թղթադրամներ։ Դեպքի վայրը շրջապատել եւ պահպանել են իրավապահները։ Թե որքան գումար է հաջողվել տանել կողոպտիչներին, պարզվում է։