Ֆրանսիայում հայտնաբերվել է երկաթի դարի դամբարանատեղի ստորգետնյա թունելով եւ հուղարկավորման կառքով

Ֆրանսիայի Իֆ քաղաքում Պրոֆիլակտիկ հնագիտական հետազոտությունների ազգային ինստիտուտի (Inrap) մասնագետները հայտնաբերել են հնագույն բնակավայրի հետքեր: Մասնագետների գնահատմամբ՝ դրանք վերաբերում են վաղ երկաթի դարաշրջանին (մ.թ.ա. V դար) եւ գոյություն են ունեցել մինչեւ ուշ միջնադար, գրում է Planet today-ը:

Մասնավորապես, գիտնականները կարողացել են նույնականացնել բնակելի կորպուսը, գյուղատնտեսական գործունեության հետքերը, բունկերները եւ հումք հայթայթելու փոսերը: Բացի այդ հայտնաբերվել են բազմաթիվ գտածոներ եւ շատ լավ պահպանված ստորգետնյա թունել:

Մասնագետները հատկապես նշել են, որ դամբարանային համալիրը ճիշտ քառանկյուն ձեւն ունի: Դրանում գտնվում էր հուղարկավորության կառք ձիերով: Հուղարկավորման այդպիսի ձեւը հատուկ էր կելտյան ժամանակաշրջանում առավել նշանակալի անձանց շրջանում եւ իրենից ներկայացնում էր հուղարկավորում մարտական կամ տոնական կառքով կարեւոր ծիսակարգային առարկաներով: Եւ, չնայած տվյալ դեպքում մնացորդները գրեթե չեն պահպանվել, այնուամենայնիվ, հնարավոր է պարզել մարմնի դիրքն ու մյուս իրերի ընդհանուր տեղը:

Գիտնականները նշել են, որ կարեւոր հայտնագործություն է նաեւ ստորգետնյա թունելը չորս առանձին մուտքերով: Ընդ որում՝ դրա պեղումների ժամանակ հնագետները կիրառել են նստվածքը հեռացնելու աննախադեպ մեթոդ վակուումային բեռնատարի միջոցով: 25 սանտիմետր տրամագիծ ունեցող ճկուն խողովակն ունակ է կլանել ամբողջ նստվածքը՝ չվնասելով ստորգետնյա կամարը: Ըստ գիտնականների՝ թունելը հիմնականում նախատեսված էր սննդամթերք պահելու համար, սակայն չի բացառվում նաեւ դրա այլ կիրառումը:

Բացի այդ, հայտնաբերված տարածքում կան առանձին դամբարանատեղիներ եւս: Դրանք վկայում են հուղարկավորման պրակտիկայի մասին, որը հայտնի էր երկաթի դարի վերջում, մասնավորապես, խոսքը վերաբերում է մեկուսացված կամ փոքր խմբերով դամբարանատեղիներին:

Հայտնաբերվել են նաեւ ավելի ուշ ժամանակաշրջանին թվագրվող տարբեր առարկաներ արեւելյան հատվածում, որտեղ գիտնականները նշել են արհեստանոցները, որոնցում անգամ պահպանվել էր ջուլհակահաստոցը: