Ժիրինովսկին կողմ է «հայկական ոճով» ինքնապաշտպանությանը

Ռուսաստանի լիբերալ-դեմոկրատական ​​կուսակցության առաջնորդ, Պետդումայի պատգամավոր Վլադիմիր Ժիրինովսկին նախօրեին «Իզվեստիա»-ի հետ զրույցում ասել է, որ Ռուսաստանի քաղաքացիներին պետք է հնարավորություն տրվի լիարժեք պաշտպանել իրենց և իրենց ընտանիքին՝ նշելով, որ համապատասխան օրինագիծը շուտով կներկայացվի խորհրդարան:

Հրապարակման համաձայն՝ խոսքը Ռուսաստանի Դաշնության Քրեական օրենսգրքի 37-րդ հոդվածի փոփոխության մասին է, որն առաջարկվում է լրացնել ևս մեկ պարբերությամբ այն մասին, որ «անձի գործողությունները, որոնք ուղղված են իրեն և իր ընտանիքին բռնությունից, բռնության սպառնալիքից կամ իր ունեցվածքը պաշտպանելուն, անհրաժեշտ ինքնապաշտպանության սահմանները չեն գերազանցում»:

Նոր փոփոխության մասին Ժիրինովսկու հայտարարությունից հետո ռուսական ԶԼՄ-ները սկսել են դիտարկել Ռուսաստանում ինքնապաշտպանությունը գերազանցելու նախադեպերը և համապատասխան դատական ​​որոշումները, որոնք հաճախ պաշտպանում են ոտնձգություն կատարողին:

«Հազվադեպ է լինում այլ կերպ: Բացառություն էր Տուլայից ֆերմեր Գեղամ Սարգսյանի հետ կապված միջադեպը: Գեղամ Սարգսյանը, 2012-ին պաշտպանելով իր կնոջն ու երեխաներին` իր տնակում սպանել է ատրճանակներով զինված երեք անձի: Ընտանիքի ղեկավարին սպառնում էր քրեական պատասխանատվություն՝ ինքնապաշտպանությունը գերազանցելու համար, բայց նահանգապետը և դաշնային լրատվամիջոցները արտահայտվել են նրա օգտին»,- գրում է Комсомольская правда-ն:

Նշվում է նաև, որ ավազակների հարձակումները չեն նվազել, և նրանք սկսել են ավելի լավ զինվել և հեռացնել վկաներին: