Բրիտանացին վիճակախաղով շահած 40 հազար ֆունտ ստերլինգը վատնել է թեթևաբարո կանանց վրա, սպանել է որդիներին և ինքնասպանություն գործել (լուսանկարներ)

Անգլիայի Լեսթերշիր կոմսության Հինքլի քաղաքի 43-ամյա բնակիչ Դևիդ Սթոուքսը վիճակախաղով շահած ամբողջ գումարը վատնել է թեթևաբարո կանանց և ավտոմեքենայի վրա, ինչից հետո հարձակվել է կնոջ վրա, սպանել է որդիներին և ինքնասպանություն գործել, գրում է Daily Mail-ը։

Երկուշաբթի՝ նոյեմբերի 25-ին, Սալլի Սթոուքսը դատական լսման ժամանակ հայտարարել է, որ ամուսինը՝ Դևիդ Սթոուքսը, 2016 թվականի նոյեմբերի 2-ին մի շարք հանցագործություններ է գործել։ Կնոջ խոսքով՝ ամեն ինչ սկսվել է նախորդ օրը։ Նա ամուսնու հեռախոսի մեջ, որը վերջինս մոռացել էր խոհանոցում, տարօրինակ հաղորդագրություն է նկատել։ Ամուսինը հեռախոսով թեթևաբարո կանանց ծառայություն էր պատվիրել և փորձել էր գտնել դեղահաբեր բռնաբարություններ կազմակերպելու համար։

Պարզվել է՝ ամուսինը պարբերաբար գումարը վատնում էր թեթևաբարո կանանց վրա։ Ընդ որում՝ նա միշտ պնդում էր, որ միջոցներ չունի որդու ուսման համար։ Քննության արդյունքում պարզ է դարձել, որ Դևիդը վիճակախաղի տոմսով 40 հազար ֆունտ ստերլինգ գումար է շահել և այն թաքցրել է ընտանիքից՝ ծախսելով թեթևաբարո կանաց ծառայությունների և ավտոմեքենայի գնման վրա։

Բրիտանուհին կատարվածը պատմել է ամուսնու եղբորը և հորը, ինչից հետո զանգահարել է ամուսնուն և զգուշացրել, որ պատրաստվում է ոստիկանություն դիմել։

Տուն վերադառնալով՝ Դևիդը ներողություն է խնդրել կնոջից: Սալլիի խոսքով՝ Դևիդը ագրեսիա չի դրսևորել և հանգիստ է եղել։ Նույն օրը երեկոյան Սալլին այցելել է ընտանիքին իրավիճակը քննարկելու նպատակով՝ երեխաներին՝ 11-ամյա Ադամին և 5-ամյա Մեթյուին, թողնելով տանը։ Երբ Սալլին 9։15-ի սահմաններում տուն է վերադարձել, ամուսինը խոհանոցում է եղել։ Դևիդը կնոջն առաջարկել է միասին թեյել, ինչից հետո Սալլին բարձրացել է երկրորդ հարկ՝ չնկատելով, որ ամուսինը հետևում է իրեն։

«Նա հարվածեց գլխիս և փորձում էր բարձով խեղդամահ անել։ Ես դիմադրում էի և Ադամին օգնության կանչում, քանի որ մտածում էի, որ միայն նա կարող էր օգնել ինձ»,- պատմել է Սալլին։ Երբ նա ամուսնուն հարցրել է, թե որտեղ են որդիները, Դևիդը պատասխանել է, թե նրանց մասին ինչ-որ մեկը հոգ է տանում։

Սալլի խոսքով՝ ամուսինը նրան հարվածել է խոհանոցային գրտնակով և փորձել կնոջ ձեռքերն ու ոտքերը մալուխով կապել, սակայն կնոջը հաջողվել է խլել գրտնակը, հարվածել ամուսնուն և փախչել բակ՝ օգնություն խնդրելու։ Դևիդն արագ ուշքի է եկել, վազել կնոջ ետևից և տուն վերադարձրել։

Երբ ոստիկանությունը մոտեցել է տանը, Սթոուքսը վերցրել է խոհանոցային դանակը և սպառնացել, որ ատրճանակ ունի, այնուհետև դանակով հարվածել է Սալլիին։ Կնոջը հաջողվել է դուրս պրծնել ամուսնու ձեռքից և փողոց վազել, որտեղ նրան էին սպասում ոստիկանները։ Ոստիկանները տուժածին հիվանդանոց են տեղափոխել և այժմ նրա կյանքին ոչինչ չի սպառնում։

«Հաջորդ օրն ինձ ասացին, որ Դևիդը սպանել է Ադամին ու Մեթյուին և ինքնսապնություն գործել»,- պատմել է Սալլին։

Սալլիի՝ տնից դուրս վազելուց հետո ոստիկանները տուն են ներխուժել և այնտեղ հայտնաբերել սպանված տղաներին ու նրանց հորը։ Սպանությունից առաջ Դևիդը երկտող է գրել, որտեղ կնոջը և սպանված որդիներին սեր է խոստովանել և ասել, որ զղջում է հանցանքների համար։