Ռուսաստանի եւ Վրաստանի միջեւ ավիահաղորդակցությունը կարող է վերականգնվել 2020-ին. ԶԼՄ-ներ

Ռուսաստանի եւ Վրաստանի միջեւ օդային հաղորդակցությունը, ամենայն հավանականությամբ, կվերականգնվի 2020 թվականի առաջին կեսին, տեղեկացնում է «Իզվեստիա»-ն՝ հղում կատարելով քաջատեղյակ կառավարական աղբյուրին։

Նրա խոսքով՝ մինչեւ Նոր տարի չվերթերը վերականգնել (իսկ նման հնարավորությունը դիտարկվում էր) թույլ չի տալիս քաղաքական ճգնաժամը հանրապետությունում, որը տեղի է ունենում մայրաքաղաքում զանգվածային հանրահավաքների ֆոնին։ Ինչպես «Իզվեստիա»-ին ասել է Վրաստանի վարչապետի Ռուսաստանի հետ հարաբերությունների հատուկ ներկայացուցիչ Զուրաբ Աբաշիձեն, Թբիլիսին միանշանակ կողջունի թռիչքների վերականգնումը երկրների միջեւ, եթե նման որոշում ընդունվի։

Հուլիսի 8-ին մտցված՝ Վրաստանի հետ օդային կապի արգելքը կարող էր հանվել մինչեւ տարեվերջ, բայց դրան խանգարել է քաղաքական ճգնաժամը հանրապետությունում՝ պայմանավորված զանգվածային բողոքներով։ Քաջատեղյակ կառավարական աղբյուրն «Իզվեստիա»-ին պարզաբանել է, որ չնայած «ռուսատյացության» նվազմանն անդրկովկասյան հանրապետությունում՝ հանրահավաքները Թբիլիսիում, որոնք շարունակվում են նոյեմբերի 14-ից, թույլ չեն տալիս խոսել երկրում կայուն եւ անվտանգ իրադրության մասին։