Ի հեճուկս բրիտանացիների. Քիմ Քարդաշյանն աջակցել է Մեգան Մարքլին (լուսանկարներ)

«Keeping Up With The kardashians» իրապատում շոուի հայազգի աստղ Քիմ Քարդաշյանը, որը պատրաստվում է ապագայում փաստաբան դառնալ, ավստրալական «The Sunday Project» շոուի ժամանակ իր աջակցությունն է հայտնել Սասեքսի դքսուհուն՝ Մեգան Մարքլին, գրում է news.com.au-ն։

Վերջին տարիների ամենաքննարկվող զույգի՝ Մեգան Մարքլի և արքայազն Հարիի մասին 39-ամյա Քիմն ասել է. «Կարծում եմ՝ յուրաքանչյուրն իր ճանապարհն ունի։ Դա նրանց անձնական կյանքն է։ Նրանք փորձում են այն պաշտպանել։ Դա կապված է նրանց մոր հետ տեղի ունեցածի, ինչպես նաև այն հանգամանքի հետ, որ նրանց կյանքը համընդհանուր ուշադրության կենտրոնում է եղել»։

Չի կարելի ասել, որ Քիմը չի սիրում պապարացիների ֆիքսած լուսանկարները, քանի որ նա դրանք պարբերաբար տեղադրում է սոցիալական ցանցերում։ Անցյալ տարի Տոկիոյում հենց նման լուսանկարների շնորհիվ է Քիմն ամուսնուն պատկանող «Yeezy» բրենդի նոր հավաքածուի գովազդային արշավն իրականացրել, երբ ամբողջ գիշեր քույրերի հետ տարբեր կերպարներով քայլել է Տոկիոյի ամենաբանուկ փողոցներով։

Շոուի ժամանակ 39-ամյա աստղը նաև ասել է, որ դժվար է պատկերացնել՝ ինչ է նշանակում ուշադրության նման աստիճանն արքայական ընտանիքի համար։ «Տարիքի և երեխաների ծննդյան հետ ես հասկացա, որ ամենակարևորը նրանց համար ավելի ապահով տեղ գտնելն է»,- նշել է Քիմը։

35-ամյա արքայազն Հարիի և 38-ամյա Մեգան Մարքլի անունը մամուլում է հայտնվում ամեն օր։ Մամուլին հակազդող վերջին գործողությունը արքայական զույգն իրականացրել է հոկտեմբերին. Սասեքսի դքսուհին դատի էր տվել The Mail on Sunday պարբերականին, որը հրապարակել էր հորն ուղղված իր անձնական նամակը: Մեծ Բրիտանիայի արքայազն Հարիի կինն իր հայցադիմումում մեղադրում է թերթին և դրա հրատարակչին` հեղինակային իրավունքի մասին բրիտանական օրենսդրությունը խախտելու և անձնական տեղեկատվության ոչ արդար օգտագործման համար:

Ավելի ուշ 35-ամյա Սասեքսի դուքսը պաշտոնական հաղորդագրությամբ քննադատել էր բրիտանական մամուլին՝ նրանց մեղադրելով «անողոք քարոզչության համար»՝ հայտնելով, որ մեծ մտավախություն ունի, որ իր կինը «կդառնա նույն ուժերի զոհը», որին զոհ դարձավ մայրը՝ արքայադուստր Դիանան:

Արքայազնի հաղորդագրությունում մասնավորապես ասվում է. «Ցավոք, կինս դարձել է բրիտանական մամուլի վերջին զոհերից մեկը, որն արշավներ է իրականացնում մարդկանց դեմ՝ չմտածելով դրանց հետևանքների մասին. անողոք արշավ, որն ահագնացել է վերջին մեկ տարվա ընթացքում՝ նրա հղիության և մեր նորածին որդու դաստիարակության շրջանում»:

«Ես կորցրի մորս ու հիմա տեսնում եմ, թե ինչպես է կինս նույն ուժերի զոհը դառնում»,- հայտնել է Հարին և հավելել, որ «այլևս չի կարող հանդուրժել նրա տառապանքները»: «Ես տեսել եմ՝ ինչ է տեղի ունենում, երբ քո սիրած մարդուն այնքան են հանրայնացնում, որ նա այլևս չի ընկալվում որպես իրական անձ»,- նշել է Հարին։

Արքայական ընտանիքին մոտ աղբյուրները փաստում են, որ չնայած արտաքուստ դժվար է հավատալ, որ դքսուհին «տանջվում» է մամուլի բացասական հրապարակումների պատճառով, այնուամենայնիվ, դրանք մեծ ազդեցություն են թողնում նրա վրա։ Արքայազն Հարիի և Մեգան Մարքլի՝ Աֆրիկա կատարած այցի մասին փաստավավերագրական ֆիլմում Սասեքսի դքսուհին խոստովանել է, որ որպես երիտասարդ մայր և կին դժվար է հաղթահարել համընդհանուր քննադատությունը։