Vollebak բրենդը ստեղծել է «անմահ» բաճկոն, որը կդիմակայի -50 աստիճան ցրտին և անգամ դանակի հարվածներին (լուսանկար)

Vollebak ապրանքանիշը ստեղծել է ուռուցիկ ձմեռային բաճկոն, որը պատրաստված է Dyneema պոլիմերային ամուր մանրաթելից: Որպես կանոն` այս մանրաթելից պատրաստված կտորն օգտագործվում է ծանր պայմաններում, օրինակ՝ տիեզերական արբանյակների և բեռնանավերի, գրում է «BURO24/7» գործակալությունը:

Նոր բաճկոնը 15 անգամ ավելի ամուր է պողպատից: Այն անգամ դանակի հարվածից չի պատռվում: Բաճկոնի յուրահատկություններից մեկն այն է, որ այն ցածր ջերմաստիճանի պայմաններում ավելի ամուր է դառնում, օրինակ՝ -50 աստիճանի դեպքում կտորի ամրությունն ավելանում է 5-10%-ով:

Դիզայներները նշում են, որ նման արտադրանք ստեղծելուն իրենց դրդել է ժամանակակից ուռուցիկ բաճկոնների հետ կապված խնդիրը: Արտադրողները փորձում են ձմեռային վերարկուները թեթև դարձնել և սինթետիկ նյութեր են օգտագործում, որոնք, ցավոք, երկարատև չեն կարող օգտագործվել: Ժամանակի ընթացքում դրանք մաշվում են, կարերը` բարակում, իսկ ահա Dyneema բաճկոնը եթե ոչ հավերժ, ապա շատ երկար կյանք կունենա:

Ուռուցիկ բաճկոնը հնարավոր է գնել 995 դոլարով: