ԱՄՆ-ում Թուրքիային մեղադրել են «կարմիր գիծն» անցնելու մեջ Ս-400-ների պատճառով

ԱՄՆ Սենատի դեմոկրատ անդամ Քրիս վան Հոլենը հայտարարել է, որ Թուրքիան անցել է հերթական «կարմիր գիծը»՝ սկսելով թեստավորելՌուսաստանից գնած ՀՕՊ Ս-400 համալիրները։ Նա այս մասին գրել է իր Թվիթերում, տեղեկացնում է ՌԻԱ «Նովոստի»-ն։

«(Թուրքիայի նախագահի Սպիտակ տուն այցելությունից) երկու շաբաթ հետո Էրդողանը անհարգալից վերաբերմունք է ցուցաբերում (ԱՄՆ նախագահ Դոնալդ) Թրամփին, ԱՄՆ-ին եւ ՆԱՏՕ-ին, ինչպես նաեւ անցնում է հերթական «կարմիր գիծը» Ս-400-ների գծով»,- ասել է սենատորը։

Վան Հոլենը ընդգծել է, որ գոյություն ունեցող օրենսդրությունը «պարտավորեցնում է Թրամփին պատժամիջոցներ մտցնել»։

Վաշինգտոնում Էրդողանի հետ բանակցությունների արդյունքներով Թրամփը տեղեկացրել էր, որ կողմերը հանձնարարել են իրենց պաշտոնյաներին աշխատել, որպեսզի լուծվեն Ս-400 համակարգերի շուրջ առկա խնդիրները։

Ավելի վաղ Milliyet թերթը, հղում կատարելով զինվորական աղբյուրին, տեղեկացրել էր, որ Թուրքիան սկսում է Ս-400-ների ռադարների աշխատանքի թեստավորումը, այդ նպատակի համար օդ կբարձրացվեն F-16 կործանիչներ եւ այլ ինքնաթիռներ։

Ռուսական նորագույն ՀՕՊ Ս-400 համակարգերի մատակարարումը, որն առաջ է բերել ճգնաժամ ԱՄՆ-ի հետ Թուրքիայի հարաբերություններում, սկսվել են հուլիսի կեսին։ Թուրքիայի նախագահ Թայիփ Էրդողանի խոսքով՝ Ս-400-ները լիովին կգործարկվեն 2020 թվականի ապրիլին։ Վաշինգտոնը պահանջում էր հրաժարվել գործարքից եւ փոխարենը ձեռք բերել ամերիկյան Patriot համալիրներ՝ սպառնալով կանգնեցնել կամ առհասարակ չեղարկել Թուրքիային նորագույն F-35 կործանիչների վաճառքը, ինչպես նաեւ պատժամիջոցներ մտցնել CAATSA-ին («Պատժամիջոցներով Ամերիկայի հակառակորդներին դիմակայելու մասին» օրենքին) համապատասխան։ Անկարան հրաժարվել է զիջումներ անել։