Ռուսաստանում գործ է հարուցվել Ադրբեջանի գլխավոր քրեական հեղինակության դեմ

Հանցավոր հիերարխիայում բարձրագույն դիրք զբաղեցնելու հոդվածով քրեական գործ է հարուցվել քրեական շրջանակներում որպես Լոտու Գուլի հայտնի Նադիր Իսմայիլովի դեմ, ուրբաթ տեղեկացրել են Ռուսաստանի Քննչական կոմիտեի մայրաքաղաքի վարչությունում եւ Ռուսաստանի ՆԳՆ մամուլի կենտրոնում, տեղեկացնում է ՌԻԱ «Նովոստի»-ն։

«Քննության տվյալներով՝ 2009 թվականից մինչ օրս Իսմայիլովը, գտնվելով Ռուսաստանի Դաշնության սահմաններից դուրս, օգտվելով հեղինակությունից եւ հանցավոր ոլորտում ունեցած ազդեցությունից, իրեն համարել է «օրենքով գող», զբաղվել հանցավոր գործունեության կազմակերպմամբ, ղեկավարմամբ եւ համակարգմամբ Մոսկվա քաղաքում եւ Ռուսաստանի այլ շրջաններում»,- ասել են ՔԿ-ում։

ՔԿ Մոսկվայի վարչությունում հայտնել են, որ 47-ամյա Իսմայիլովի (մինչեւ ազգանունը փոխելը՝ Սալիֆով, որը ազատազրկման վայրերում հայտնի է որպես «Գուլի») հանդեպ բացված է քրեական գործ ՌԴ ՔՕ 210.1 հոդվածով (բարձրագույն դիրք հանցավոր հիերարխիայում)։

Իսմայիլովը 2017 թվականից գտնվում է միջազգային հետախուզման մեջ, նա հեռակա ձերբակալվել է դատարանի կողմից, տեղեկացրել են ՆԳՆ մամուլի կենտրոնում։ Իրավապահների տվյալներով՝ այժմ տղամարդը թաքնվում է ՌԴ սահմաններից դուրս։

«Տղամարդը մեղադրվում է Մոսկվայում եւ Տոլյատիում երեք քաղաքացու առեւանգումը կազմակերպելու մեջ՝ դրամ շորթելու նպատակով։ Հակաիրավական հանցանքներ են կատարվել նրա՝ ազատազրկման վայրերում գտնվելու պահին, Ադրբեջանի տարածքում»,- տեղեկացրել են մամուլի ծառայությունում։

Սալիֆովը, որը համարվում է «Ադրբեջանի գլխավոր մաֆիոզը», իր ազդեցությունն օգտագործել եւ քրեականներին ղեկավարել է Մոսկվայում, Ռուսաստանի տարածաշրջաններում եւ արտասահմանում:

Սալիֆովը հիմա թաքնվում է Կատարում, այնտեղ է փախել Թուրքիայից՝ մյուս քրեական հեղինակությունների կողմից ներկայացվող պահանջների պատճառով:

ՌԴ նախագահ Վլադիմիր Պուտինն ավելի վաղ օրենք էր ստորագրել, որը խստացնում է քրեական պատասխանատվությունը քրեական հեղինակությունների եւ հանցավոր միությունների կազմակերպիչների համար: «Հանցավոր հիերարխիայում բարձրագույն դիրք գրավելու համար» նախատեսվում է 8-ից մինչեւ 15 տարվա ազատազրկում՝ մինչեւ 5 մլն ռուբլի տուգանքով: Օրենքը բացառում է պայմանական դատապարտման կիրառման հնարավորությունը: Բոլոր այն անձինք, որոնք նախկինում եղել են կազմակերպված հանցավոր խմբավորման մեջ, բայց դրանից դուրս են եկել կամ իրավապահ մարմինների հետ համագործակցել են հանցավոր գործունեության բացահայտման նպատակով, քրեական պատասխանատվությունից ազատվում են: