Լիբանանում ցուցարարները 171 կմ երկարությամբ կենդանի շղթա են կազմել (լուսանկարներ, տեսանյութ)

Լիբանանում հակակառավարական ցույցերի շրջանակում կիրակի՝ հոկտեմբերի 27-ին, ցուցարարները, միմյանց ձեռք բռնելով, կենդանի շղթա են կազմել: Այս մասին տեղեկացնում է Reuters գործակալությունը:

Շղթան ձգվել է 171 կմ երկարությամբ՝ հյուսիսից հարավ:

Կիրակի հակակառավարական ցույցերի 11-րդ օրն էր, քաղաքացիները մեղադրում են քաղաքական գործիչներին կոռուպցիայի և տնտեսության քայքայման համար: Նման բազմամարդ բողոքի ակցիաներ Լիբանանում տեղի չէին ունեցել 1975-1990 թվականների քաղաքացիական պատերազմի ժամանակներից ի վեր:

Ավտոճանապարհների երթևեկությունն ամբողջովին փակվել է, բանկերը հայտարարել են, որ երկուշաբթի նույնպես չեն աշխատելու: Փակ են դպրոցներն ու բազմաթիվ կազմակերպություններ: Բանկերը չեն աշխատում արդեն մեկ շաբաթից ավելի:

Համաժողովրդական բողոքի ակցիաներն ուղղված են երկրի քաղաքական ինստիտուտների դեմ: Լիբանանի բնակիչները, որոնք ներկայացնում են տարբեր կրոնական խմբեր, մեղադրում են քաղաքական գործիչներին իշխանության չարաշահման և պետության ռեսուրսները սեփական հարստացմանն ուղղելու համար: Խորանում են ֆինանսական դժվարությունները, շրջանառությունից անհետանում է ԱՄՆ դոլարը, լիբանանյան ֆունտն ավելի ու ավելի է արժեզրկվում:

Վերջին օրերին Լիբանանի կառավարությունը հայտարարել է շտապ բարեփոխումների փաթեթի մասին, բայց անգամ դա չի թուլացրել ցուցարարների ճնշումն իշխանությունների նկատմամբ, ոչ էլ բացել է դոնոր պետությունների հիմնադրամները, որոնք դեռ անցյալ տարի խոստացել էին Լիբանանին տրամադրել 11 միլիարդ դոլար՝ արդեն վաղուց ուշացած բարեփոխումների կատարման համար:

Վատիկանում Հռոմի Ֆրանցիսկոս պապն աղոթք է հնչեցրել Լիբանանում բողոքի ցույց անցկացնող երիտասարդների համար և դիմել է միջազգային հանրությանը՝ կոչ անելով օգնություն ցուցաբերել Լիբանանին, որպեսզի բնակչության բոլոր շերտերն ու կրոնական խմբերը հաշտ ու համերաշխ ապրեն: