Պատժամիջոցներ ույղուրներին հալածելու համար

Միացյալ Նահանգները «սև ցուցակում» է ներառել չինական 28 կազմակերպությունների, որոնք առևտրի նախարարության փոխանցմամբ, Չինաստանի Սինծյանի նահանգում ներգրավված են ույղուրների իրավունքների ոտնահարմանն ուղղված գործողությունների մեջ: Ույղուրները Սինծյանի նահանգում բնակվող մահմեդականներ են:

ԱՄՆ առևտրի նախարարության կարգադրությամբ, ընկերություններին արգելվում է ապրանքներ գնել այդ ընկերություններից՝ առանց ԱՄՆ կառավարության թույլտվության:

ԱՄՆ առևտրի նախարարության փոխանցմամբ, այդ ընկերությունները նպաստում են Չինաստանում պետական մակարդակով իրականացվող արշավին, որի ընթացքում ույղուրների, ինչպես նաև տեղացի ղազախների և ազգային այլ փոքրամասնությունների ներկայացուցիչների նկատմամբ հսկողություն է սահմանվում արդիական տեխնոլոգիաների միջոցով և կիրառվում են ապօրինի ձերբակալություններ:

28 ընկերությունների ցանկում են հանրային անվտանգության 20 գործակալություններ, տեսադիտարկումներ իրականացնող Hikvision ընկերությունը, մարդու դեմքի վերլուծության եղանակով նրա ինքնությունը պարզող մեթոդը կիրառող Sense Time ընկերությունը և տեխնոլոգիական այլ կազմակերպություններ:

Ենթադրվում է, որ Չինաստանը խիստ արձագանք կտա ԱՄՆ առևտրի կազմակերպության ընդունած որոշմանը:

ՄԱԿ-ի տվյալներով, Սինծյանի նահանգում առնվազն մեկ միլիոն ույղուրներ և ազգային այլ խմբերի ներկայացուցիչներ պահվում են ճամբարներում:

Պաշտոնական Պեկինը պնդում է, որ դրանք ոչ թե մարդկանց բռնի ուժով պահելու ճամբարներ են, այլ դաստիարակման և ուսուցման կենտրոններ:

«Սինյանում Չինաստանի վարած հալածանքների քաղաքականությունը ոչ թե ահաբեկչության դեմ պայքար է, այլ սեփական քաղաքացիների բնաջնջում»,- սեպտեմբերի 22-ին հայտարարել է ԱՄՆ պետքարտուղար Մայք Փոմփեոն: