Խամենեին հայտարարել է, որ «թշնամիները» չեն կարող տարաձայնություններ սերմանել Իրանի և Իրաքի միջև

Իրանի գերագույն հոգևոր առաջնորդ Ալի Խամենեին հայտարարել է, որ թշնամիները չեն կարողանոա տարաձայնություններ սերմանել Իրանի և Իրաքի միջև: Այս մասին տեղեկացնում է РИА Новости-ն:

«Իրաքն ու Իրանը երկու ժողովուրդներ են, որոնց սիրտն ու հոգին կապված են Աստծո հանդեպ հավատով, Իմամ Հուսեյնիի նկատմամբ սիրով և մարգարեի սերունդներով: Այդ դաշինքն օրեցօր ավելի կամրանա: Թշնամիները փորձում են տարաձայնություններ սերմանել մեր երկրների միջև, բայց դա նրանց չի հաջողվի»,- ասված է Խամենեիի թվիթերյան գրառման մեջ:

Իրաքում հոկտեմբերի 1-ից հակակառավարական ցույցեր են սկսվել՝ գործազրկության և կոռուպցիայի դեմ պայքարելու պահանջով: Այս դժգոհություններն առաջինն են մեկ տարի առաջ Ադիլ Աբդուլ Մահդիի կառավարության նշանակումից ի վեր: Ցույցերի ընթացքում բախումներ են գրանցվում ուժայինների հետ, իսկ վերջիններս ուժ են կիրառում:

Ներկայիս դրությամբ, Իրաքի ՆԳՆ տվյալներով, կա 104 զոհ և 6000 տուժած, նրանց թվում՝ ցուցարարներ և ոստիկաններ: Ոչ մի կուսակցություն կամ քաղաքական առաջնորդ չի հայտարարել, որ ինքն է կանգնած այս բողոքի ակցիաների ետևում: ՄԱԿ-ը պահանջել է Իրաքից դադարեցնել բռնությունները խաղաղ ցուցարարների նկատմամբ և բաց քննություն սկսել քաղաքացիների մահվան գործերով:

Ավելի վաղ Իրանի արտաքին գործերի նախարարությունը հայտարարել էր, որ Թեհրանն ակնկալում է Իրաքի իշխանությունների կողմից բողոքի ցույցերի հանդարտեցմանն ուղղված քայլեր: Հայտարարության մեջ ասվում էր նաև, որ Իրանն ակնկալում է Իրաքի իշխանությունների համագործակցությունը քաղաքական ուժերի և հոգևորականության հետ՝ երկրում հանդարտություն հաստատելու համար՝ զգուշացնելով, որ իրավիճակից կարող են օգտվել արտասահմանյան ուժերը: