Ժակ Շիրակի հրաժեշտի արարողությունը տեղի կունենա սեպտեմբերի 29-ին

Ֆրանսիայի իշխանությունները պատրաստվում են Ֆրանսիայի նախկին նախագահ Ժակ Շիրակի հրաժեշտի արարողությունն անցկացնել Փարիզի 7-րդ օկրուգում Հաշմանդամների տան առջեւ կիրակի՝ սեպտեմբերի 29-ի կեսօրին, հաղորդում է ՏԱՍՍ-ը՝ հղում անելով Europe1-ին:

Ռադիոկայանի տեղեկություններով՝ տեղն ու ժամն ընտրել են սեպտեմբերի 26-ին մահացած 86-ամյա քաղաքական գործչի հարազատները: Դեռեւս բաց է մնում այն հարցը, թե արդյոք հանգուցյալ նախկին նախագահի աճյունով դագաղը կդրվի համընդհանուր դիտման: Այժմ երկրի իշխանությունները մշակում են միջոցառման մանրամասները, ավելի հստակ տեղեկություն կտրվի օրվա ընթացքում:

Ինչպես նախօրեին հայտնել է Ֆրանսիայի նախագահ Էմանուել Մակրոնը, երկուշաբթի ամբողջ երկրում սգո օր կհայտարարվի, իսկ 6-րդ օկրուգի Սեն Սյուլպիս եկեղեցում տեղի կունենա հրաժեշտի ծիսակատարությունը, որին ներկա կլինեն ներկայիս նախագահը, ինչպես նաեւ այլ պետությունների ղեկավարներ: Ռադիոկայանը հիշեցնում է, որ Ժակ Շիրակն անձամբ ծանոթ էր աֆրիկյան պետությունների մի շարք առաջնորդների, ինչպես նաեւ Գերմանիայի կանցլեր Անգելա Մերկելի եւ ՌԴ նախագահ Վլադիմիր Պուտինի հետ:

Ժակ Շիրակի փեսան՝ Ֆրեդերիկ Սալա-Բարուն նախօրեին հայտնել էր, որ նախկին նախագահը մահացել է առավոտյան իր հարազատների շրջապատում:

Ժակ Շիրակը հեռացել է քաղաքականությունից երկու ժամետով երկիրը ղեկավարելուց հետո՝ 1995-ից մինչեւ 2007 թվականը: Ֆրանսիական լրատվամիջոցները հիշեցնում են, որ 2005-ին քաղաքական գործչի մոտ սրտանոթային համակարգի հիվանդություն էր ախտորոշվել: 2016-ին նրա առողջական վիճակը կտրուկ վատթարացել էր ավագ քրոջ մահից հետո: Վերջին 3 տարիներին նախկին նախագահը չի մասնակցել պաշտոնական արարողություններին, հազվադեպ է այցելուների ընդունել: